Халқаро ташкилотлар Австриядаги туркман фаолининг тақдиридан хавотирда

Тухбатуллин муҳожиротдаги туркман инсон ҳуқуқлари гуруҳига етакчилик қилади

Халқаро Амнистия ва Ҳьюман Райтс Вотч ташкилотлари Австрия ҳукуматини Венада яшаётган туркманистонлик инсон ҳуқуқлари фаоли Фарид Тухбатуллинни ҳимоя қилишга чақирган.

Халқаро ташкилотларга кўра, Тухбатуллин K+ сунъий йўлдош каналига берган интервъюсида Туркманистондаги вазиятни танқид қилиши ортидан туркман махсус хизматлари уни йўқ қилишни режалаётган бўлишлари мумкин.

Халқаро Амнистиянинг баёнотида Ашхободдаги ишончли манбаъга иқтибосан миллий Хавфсизлик мулозимлари Тухбатуллиндан қутулиш масаласини муҳокама этганликлари айтилади.

Фарид Тухбатуллин Туркманистон Инсон Ҳуқуқлари Ташаббуси гуруҳига раҳбарлик қилади. Би-би-си Фарид Тухбатуллин билан боғланиб, таҳдидлар ва Туркманистондаги вазият ҳақида сўраган.

Фарид Тухбатуллин: Манбаълар, табиийки махфий, аммо ишончли. Халқаро Амнистия ва Ҳюман Райтс Вотч ташкилотлари бу ҳақда баёнот чиқаришди ва ҳозир Оврўпо парламентида ҳам бу масала гапирилди. Бу ахборотнинг жиддийлигига менда ҳеч қандай шубҳа йўқ. Мен ҳозир Брюсселдаман, Оврўпо парламентида Турманистондаги вазиятга доир учрашувларимиз бўлаяпти. Австрияга боргандан кейин мен бу борада Австрия ҳуқуқ-тартибот идораларига мурожаат қилмоқчиман.

Би-би-си: Сиз инсон ҳуқуқлари билан узоқ йиллардан буён шуғулланиб келасиз. Нима учун айнан ҳозир туркман махсус хизматлари сизни йук килмокчи, деб ишонасиз?

Фарид Тухбатуллин: Ҳа, мен инсон ҳуқуқлари билан анчадан буён шуғулланаман. Аммо гап шундаки, охирги икки йилда босимлар кучайганини сезаяпмиз. Хатто мен билан тасодифан таниш бўлган ва мен ўн йилдан буён умуман мулоқот қилмаган одамларни ҳам туркман махсус хизматлари чақириб, сўроққа тутишмоқда. Бундан ташқари мен интернет ва бошқа каналлар орқали доимий таҳдидларни олаяпман. Туркманистон президенти ҳузуридаги Миллий Хавфсизлик Кенгашининг яқинда ўтган мажлисида Бердимуҳамедов "туҳматчиларга қарши курашишга" чақирди. У туҳматчилар деганда туркман ҳукуматини танқид қилаётганларни назарда тутгани аниқ. Буларнинг ҳаммаси ва мен Ашхободдан олган маълумот таҳдидларнинг жиддийлигидан далолат беради.

Би-би-си: Туркманистонда таъқиб ва таҳдидлар ҳамма вақт бўлган. Ҳозир вазият қанчалик ёмон, деб айтиш мумкин?

Фарид Тухбатуллин: Ўтган вақт давомида шунга амин бўлаяпмизки, Президент Бердимуҳамедов танқидга аввалги президент Ниёзовдан кўра ҳам кўпроқ оғриқ билан муносабат билдиради. Бизнинг ҳар бир чиқишимиз, ҳар бир айтган сўзимиз Туркманистонда изсиз кетмайди. У ердаги фаоллар, биз билан мулоқот қилганларни уриб кетиш ёки бошқа жисмоний ва руҳий босим ўтказиш ҳоллари кўпайиб бормоқда. Туркманистондаги вазиятни яқиндан ўрганаётганлар бундан яхши хабардор.

Би-би-си: Аммо Туркманбошидан фарқли ўлароқ, жаноб Бердимуҳамедов, хусусан Оврўпо Иттифоқи билан яқиндан мулоқот ўрнатган ва Оврўпо мулозимлари Ашхободда кунда-шунда. Сизнинг-ча, ғарб Бердимуҳамедовнинг тузуми ҳақида янглиш тасаввурдами?