Ўзбекистонга Мисрдан қайтиб келган талабаларнинг 5 нафари ўз уйларига етиб боришмаган. Бу хақда ЯНГИ ФИКРга хабар берган Кохирадаги Ал Азхар университетининг талабасига кўра, 3 феврал куни Ўзбекистонга қайтган  ўзбек талабаларининг 5 нафари хозиргача ўз уйларига етиб бормаган.

Ўзини Бошқирдистонлик Сефер дея таништирган ва хозирда Қохирада қолаётган бу талабага кўра, у таниган Ўзбекистонлик, ўтган хафта пайшанба куни 180 нафар ўзбекистонликни олиб Тошкентга учган самолетга чиққан эди.

"У учиб кетганидан сўнг орадан 3 кун ўтгач мен  уйига телефон қилдим ва унинг хали уйга етиб келмаганини эшитдим ” дейди Сефер.

Ғойиб бўлган талабанинг яқинлари Сеферга, Тошкент тайёрагохида Мисрдан келган талабаларни жуда қаттиқ текширишганини, уларнинг хар бирини суратга олишиб, бармок изларидан нусха олишганини айтишган.

Тайёргохдаги текширувдан сўнг, талабаларнинг кўпчилиги уйларига йўл олишган, лекин 5 нафар талаба кутиб олувчилар олдига чиқмаган. Уларни тайёргохдан номаълум томонга олиб кетишган.

Нима учун Мисрдан қайтган талабаларни Тошкентда қаттиқ текширишган? Уларни қаёққа олиб кетишган, Миллий Хавфсизлик хизмати хибсхонасигами ёки Ички Ишлар вазирлиги ертўласигами? Бу талабалар кимлар ва қайси вилоятлардан эди? Бу саволарга жавоб олишнинг хозирча имкони йўқ.

Йўқолган талабаларнинг Мисрда қолаётган бошқа биродарлари  тўлиқ маълумот беришдан негадир хавфсирашяпти.

www.yangifikr.com