Баҳрайн расмийларининг тасдиқлашича, қироллик илтимоси билан бир қатор Форс Кўрфази мамлакатлари, хусусан Саудия Арабистони ва Бирлашган Араб Амирликларидан қўшинлар Баҳрайнга келишган.
Якшанба куни аксил-ҳукумат намойишчилари ва хавфсизлик кучлар ўртасидаги тўқнашувларда бир неча киши ҳалок бўлган ва ўнлаб одамлар жароҳат олган.
Бу бир ойдирки давом этаётган зўравонликларнинг энг қонлиси бўлди.
Намойишчилар полиция тўсиқларини бузиб, хавфсизлик кучлари билан юзма-юз келганлар.
Баҳрайн аҳолисининг аксариятини ташкил қилувчи шиа мусулмонлар сунний ҳукмдор элита қўлида камчиликларга юз тутиб келишидан кўпдан бери шикоят қилиб келади.
Баҳрайндаги намойишлар ўтган ой Миср ва Тунис ғалаёнларида президентлар қулатилганидан сўнг авж олган.
Мухолифат мамлакатга хорижий қўшинларнинг келиши ишғолга тенг эканини айтишмоқда.
Бироқ, қироллик расмийлари аҳолини "қўшинларни ҳуш қарши олишга ва тўла ҳамкорлик қилишга" ундаган.
Илтимос қондирилди
Саудий расмийси душанба куни эрталаб Баҳрайнга 1000 саудий қўшинлари келгани, кейинроқ Бирлашган Араб Амирликлари 500 полициячисини йўллаганини хабар қилди.
Гувоҳларга кўра, саудий ҳарбийлар ўзлари билан 150та зирхли БТРларни ҳам олиб келишган.
Саудий Арабистони ҳукумати ўзи чиқарган баёнотда "Баҳрайннинг дастак сўраб қилган илтимосига жавоб бердик" деб айтган.
Қўшинлар Кўрфаз Ҳамкорлик Кенгаши ташкилоти доирасида жойлаштирилмоқда. Ташкилот олтита аъзо: Баҳрайн, Саудий Арабистони, Қувайт, Оман, Қатар ва Бирлашган Араб Амирликларидан ташкил топган.
Хорижий қўшинлар Баҳрайннинг муҳим иншоотлари, жумладан нефть ва газ корхоналари, ҳамда молиявий идораларини мудофаа этиши ишонилади.
Мулоқот йўқ
Душанба куни намойишчилар пойтахт Манамадаги Марварид майдонини ишғол этишда давом этганлар.
"Биз ҳар қандай аскар ё ҳарбий машинанинг Баҳрайн ҳудудига киритилишини Баҳрайн қироллигининг ишғол этилиши ва Баҳрайннинг қуролсиз халқига қарши фитна деб ҳисоблаймиз", дейилди мухолифат баёнотида.
Подшоҳ Ҳамад бин Исо ал Халифа намойишчилар билан мулоқотга киришни таклиф қилган, бироқ улар ҳукуматнинг истеъфога чиқишини исташларини айтиб мулоқотдан бош тортганлар.
Намойишчиларнинг аксари подшоҳни тўнтариш ниятлари йўқлиги, аммо ҳукмдор оила кўпчилик ваколатларини халқ сайлаган парламентга беришини исташларини айтганлар.
Бошқалар эса подшоҳ ағдарилиб, ўрнига республика ташкил топишини хоҳлайди.
Саудий Арабистони ўз ҳудудида ҳам шиа озчилигининг важоҳатини сўндиришга уринмоқда. У шиа демократпараст фаолларнинг намойишларини бостирган.