Ўзбекистондаги Эксперт Ишчи
гуруҳи томонидан чиқарилган ҳисоботга кўра, Сурхондарё вилоятида мавжуд
вазиятдан оммавий норозилик кайфиятлари ўсиб бормоқда.
Ҳисоботда айтилишича, август ойига режаланган
"Баркамол авлод" деб номланган спорт мусобақаларига тайёргарликлар
манзарасида вазият янада ёмонлашган.
Эксперт Ишчи гуруҳи раҳбари Суҳроб Исмоиловнинг
айтишича, мана шу тайёргарликлар ишларига аҳолининг баъзи қатламлари
мажбурий равишда жалб қилинмоқда.
"Бунга мисол сифатида ўрта мактаблар, академик
лицейлар, коллежлар ва олий ўқув юртлари ўқитувчилари ҳамда талабаларни
келтириш мумкин. Улар 10-15 кунгача шу вилоятда жойлашган спорт
объектларини оқартириш, тозалаш ва қайта таъмирлаш ишларига мажбуран
жалб этиляпти. Ва уларнинг мана ишларга қатнашишларига кетадиган
харажатлар ҳеч ким тарафидан қопланмаяпти".
Бундан ташқари, Суҳроб Исмоиловга кўра,
ўқитувчиларнинг 10 фоиздан 20 фоизгача бўлган маошлари жойлардаги
ҳокимиятлар талаби билан банк тарафидан ушлаб қолиняпти ва бу ҳам
мусобақаларга тайёргарлик ишлари учунлиги айтилган.
"Биз яна ҳайдовчиларнинг ҳам фикрларини олдик.
Кейинги пайтларда айнан шу мусобақага рўкач қилиниб, жойлардаги давлат
инспекцияси ходимлари дуч келган ҳайдовчини тўхтатиб, 5 мингдан 10 минг
сўмгача бўлган миқдорда пул талаб қилишяпти. Буларни гўёки жарима
сифатида расмийлаштириб, бу пул ҳам, шу ходимларнинг сўзларига
қараганда, гўёки шу вилоятда кетаётган мусобақаларга тайёргарлик
ишларига керак эмиш".
Эксперт Ишчи гуруҳининг айтишича, айнан мана шу
ҳодисалар доирасида аҳолининг кайфиятлари ўрганилган, аммо кузатувлар
бундай норозиликлар асосан жойлардаги судларнинг адолатсизлиги ва шунга
ўхшаш шикоятларни ўз вақтида кўриб, одил бир қарор чиқарадиган маъмурий
органларнинг самарали ишламаслиги туфайли жуда кўпдан бери йиғилиб
келяпти.
"Бу қандай натижага олиб келишини биз аниқ айта
олмаймиз. Лекин, умумий битта хулоса чиқарадиган бўлсак, бундай ҳолат
билан тўқнаш келган аҳоли гуруҳлари бунинг ҳамммасини марказий
ҳукуматнинг буйруғи, топшириғи билан бўлаётган нарса, қолаверса,
Президент ёки Бош вазирнинг топшириғи билан бўлаётган нарса, деб
баҳолашяпти. Одамларда мана шунақа кайфият уйғоняпти", дейди Эксперт
Ишчи гуруҳидан Суҳроб Исмоилов.
Аммо, унинг айтишича, норозиликлар ортида бундан
ҳам кенгроқ сабаблар бор. Бунга фермер хўжалиги ва маҳаллий ҳокимият
ўртасидаги зиддиятларни мисол қилиб келтириш мумкин.
"Ҳар қандай бу каби ҳолатлар ортидан аҳолининг
марказий ҳокимиятга бўлган ишончи сўнаяпти, десак бўлади", дейди Суҳроб
Исмоилов Би-би-си билан суҳбатда.
Эксперт Ишчи гуруҳи бошқа вилоятлардаги вазиятни
ҳам ўрганишга ҳаракат қилингани ва Фарғона водийсида, хусусан,
Андижонда қишлоқ аҳолиси, мактаб ёшидаги болаларни "пилла етиштиришга
мажбурий" жалб қилиш жараёнлари бошланиб кетган.