Пресс-релиз №24, 10.06.2011 йил

ҚОЧҚИНЛАР ИШИ ЖАМОАТЧИЛИККА ОШКОР ҚИЛИНИШИ КЕРАК

Кеча Қозоғистондан мамлакатимизга экстрадация қилинган 29 нафар қочқин Тошкент вилояти Ички ишлар бошқармаси тергов изоляторига келтирилгани ҳақида хабарлар бор. Улар тез кунда ўз манзили бўйича турли тергов изоляторларига тарқатилади. Ўзбекистон Республикаси Бош прокуратураси, Ички ишлар органлари ҳамда Миллий хавфсизлик хизмати томонидан ўта оғир жиноятларда айбланиб, қидирувга берилган бу шахсларнинг аксарияти мамлакат конституциявий тузумига тажовузда айбланган. БМТ мандагига эга бўлган виждон асирларини Қозоғистон ҳуқуқни муҳофаза қилиш идоралари Ўзбекистонга тутиб топширди. Демократия ва инсон ҳуқуқлари борасида юксалиш иддао қилаётган Қозоғистон ҳукуматининг сиёсий қарори маҳкама томонидан ҳам қонунлаштирилди.

Ўзбекистон инсон ҳуқуқлари "Эзгулик” жамиятига мурожаат қилган қочқинларнинг қариндош-уруғлари фарзандларининг Ўзбекистон ҳукумати қўлига топширилганидан таассуф билдириб, уларга нисбатан эҳтимолий қийноқ ва адолатсиз маҳкама қарорларидан хавотирларини билдиришмоқда. Ҳюман Райтс Вотч ташкилоти фаоли Вероника Голдстон таъкидлаганидек, Қозоғистоннинг ўз зиммасига олган халқаро мажбуриятларга зид равишда қочқинларни бериб юбораётгани инсоний фожиадир. Эндиликда БМТ Қочқинлар идораси каби халқаро гуруҳлар, Халқаро Қизил Хоч ташкилоти ходимлари уларнинг ёнига киритилишига эришиш керак. Шу боисдан ҳам бугун "Эзгулик” жамияти Республика Бош прокуратурасига мурожаат йўллаб, ўз фаолларининг қочқинлар ҳуқуқларини ҳимоя қилиши борасидаги талабларига тез орада жавоб берилиши лозимлиги, гумондорлар иши жамоатчиликка ошокр қилиниши зарурлигини урғулади.

Эслатиб ўтамиз, бир йиллик умрини Қозоғистон ҳибсхоналарида ўтказган 29 нафар қочқин 2010 йилнинг июнида ўтказилган рейдлар чоғида қозоқ полициячилари ва махфий хизматлари томонидан ҳибсга олинганди. Шу йилнинг март ойида эса Қозоғистон маҳкамаси қочқинларни Ўзбекистонга экстрадиция қилиш бўйича қарор чиқарди. 14 апрелдаги апеллация суди эса қарорни қувватлади.
Ўзбекистон инсон ҳуқуқлари "Эзгулик” жамияти