Голландия Шикоятлар маҳкамаси 1995 йилда Босниянинг Сребреница шаҳрида уюштирилган қатлиом чоғида уч мусулмоннинг ўлдирилишида голланд давлатини айбдор, деб топган.
Босниялик серб кучлари бостириб кирган чоғларида Бирлашган Миллатлар назорати остида бўлган Сребреница шаҳрига голланд қўшинлари масъул бўлишган.
Сребреницадаги қатлиомлар чоғида 8.000 га яқин мусулмон эркак ва ўғил болалари қатл этилишганди.
Сўнгги маҳкама иши эса, улардан уч нафарининг ўлдирилиши билан боғлиқ.
Гаагадаги маҳкамага кўра, Бирлашган Миллатлар ваколати остида бўлган голланд қўшинлари уч мусулмонни босниялик серб ҳарбийларига бермасликлари лозим бўлган.
Ҳукмда айтилишича, худди шу сабабдан ҳам, уларнинг ўлимида голланд давлати айбдордир.
Маҳкаманинг бу каби қарори кўпчилик учун кутилмаган бўлган ва энди қурбонлар яқинларининг товон пули даъвоси билан чиқишларига йўл очиши мумкин.
Чунки Бирлашган Миллатларнинг таржимони Ҳасан Нуҳанович ва электрчи Ризо Мустафичнинг яқинлари 9 йилдирки, адолатни қарор топтиролмай келишаётганди.
Сребреница қатлиоми Голландияда қалтис мавзулардан саналади.
Голланд қўшинларининг юз берган оммавий қатллар чоғидаги хатти-ҳаракатлари кескин танқид қилинган ҳисобот ортидан, 2002 йилда мамлакат ҳукумати истеъфо беришга ҳам мажбур бўлганди.
Ўшандан буён Голландиянинг даъво қилишича, Болқон уруши чоғида Бирлашган Миллатлар ташкилоти юзларини ерга қаратиб қўйган.
Уларга кўра, халқаро ташкилот ўз қўшинларига етаклича дастак кўрсатмаган.
