Пресс-релиз №31, 04.08.2011 йил

СИРДАРЁЛИК ФУҚАРОЛАРГА МЎМИН ҲОЖИНИНГ

РАМАЗОНДАГИ ЗУҒУМИ

Мустақилликнинг 20 йиллиги тантаналари арафасида Гулистон жомъе масжидига ёндош уч хонадон вакилларининг бошпанасиз қолиши нақд бўлиб қолди. Бугун Гулистон шаҳар ҳокими ўринбосари Абдумўмин Пардаев бошчилигидаги отряд хонадоннинг электр ва газ таъминотини узиб, уларга ҳеч бир суд қарорисиз кўчиш талабини қўйди, деб хабар қилди жамиятимизнинг Сирдарёдаги фаоллари. Маълум бўлишича, Сирдарё вилояти имом-хатиби Мўмин ҳожи Усмоновнинг манфаатлари кўзланиб амалга оширилаётган бу зўровонликда шаҳар ҳокимлиги, ИИБ нозирлари фаол иштирок этишмоқда. Фуқаролар Шерзод Қаюмов, Наим Ахмедов ҳамда Маъмура Қаюмовалар хонадонлари бузилиб, унинг ўрнида масжидга ёндош қўшимча иморат қурилиши кўзланаётган "ободонлаштириш” туфайли фуқаролар уй-жойларидан маҳрум бўлиши аниқ.

Гулистон шаҳар ҳокими Нодир Сулаймоновнинг зудлик билан чиқарилган 803-сонли қарорига мувофиқ, фуқаролар ўз уйларини ташлаб чиқиши шарт, уларга уй-жой қуриш учун ер ва кредит маблағлари берилади. Давлат кадастр хизмати ва бошқа тегишли расмий идоралардан рўйхатдан ўтмаган ҳокимнинг бу қарори бўйича ҳатто бугуннинг ўзида миршабларнинг зуғуми остида фуқаро Шерзод Қаюмов банкка олиб келинди, аллақандай кредит шартномасига имзо чекишга мажбур қилинди. Уйи бузилаётган яна икки хонадон эгаларига эса миршаблар воситасида таҳдид қилиниб, уйларини ташлаб чиқишмаса қамалиши билан пўписа қилишди. "Буларнинг барчаси фуқароларни уйидан қувиб чиқаришга қаратилган ҳужумдир. Ҳокимнинг қарори бажарилиши гумон остидаги бир ҳужжат, тўғрироғи, фуқароларни тинчлантиришга қаратилган ҳаракатдир” дейди маҳаллий "Эзгулик”чилар.

Аслида эса, бу ерда масжидга ёндош бир бино қурилиши, унинг истиқлол тантаналари номи билан сиёсийлаштирилаётгани, бундан жомъе масжид имом-хатиби Мўмин ҳожи Усмоновнинг манфаатдорлиги маълум, дейди фуқаролар. Шу боисдан ҳам воқеага аралашишга уринган ҳуқуқ ҳимоячиларининг ташриф қоғозлари Гулистон шаҳар ИИБ нозири Рустам Шаропов томонидан йиртиб, улоқтирилди. Миршаб-у ҳокимлар вилоятда қўли узун ҳожининг манфаатлари учун ўлиб-тирилишмоқда.

Эслатиб ўтамиз, Сирдарё вилояти имом-хатиби Мўмин ҳожи Усмонов Ўзбекистон Мусулмонлари идораси, шахсан муфтий Усмонхон Алимовнинг қўллаб-қувватлови остида жамиятнинг собиқ фаоли Карим Бозорбоевни қаматган, ўзининг ҳаж баҳонасидаги фирибгарликлари ошкор қилингани учун интиқом олганди. Жаҳон ҳамжамиятининг босими билан ҳуқуқ фаоли озод қилинди, аммо ҳожи жиноятлари учун жавоб бермади. Эҳтимол, унинг ҳозирги зўровонлиги ҳам жиноят учун жазоланмаслик ҳиссининг маҳсулидир. 

         Ўзбекистон инсон ҳуқуқлари "Эзгулик” жамияти