Пресс-релиз №34, 15.09.2011 йил
БУХОРОДА БЕЧОРА АЁЛНИ КАЛТАКЛАГАН МИРШАБ ҲИМОЯСИ УЧУН ТИЗИМ ОЁҚҚА ТУРДИ
Ҳатто маъмурий давлат бошқаруви тизими нормал йўлга қўйилмаган қирғиз ҳукумати ҳуқуқни муҳофаза қилиш органлари томонидан фуқароларга нисбатан қийноқлар қўлланилаётганидан ташвишда. Оммавий ахборот воситалари хабарига кўра, мамлакат раҳбари Роза Ўтунбаева Миллий хавфсизлик қўмитаси ва Ички ишлар вазирлиги қошидаги фуқаровий назорат кенгашлари йиғинида бу масалага тўхталибди. Дунёда илғор ва қудратли ҳуқуқий жамият қурганини даъво қилаётган бизнинг ҳукуматимиз эса афсуски зўровон миршабларни ҳимоя қилиш дардида. Масалан, Бухоро вилояти Ғиждувон тумани ИИБнинг муштумзўр ходими ҳаракатлари бутун бошли ҳуқуқни муҳофаза қилиш тизими раҳбарлари томонидан рағбатлантирилмоқда.
Туманнинг "Биёсин” маҳалла фуқаролар йиғинида яшовчи Садоқат Ҳайдарова ўтган йилнинг 12 ноябрида участка профилактика нозири Фурқат Қурбонов томонидан шавкатсизларча калтакланган. Ўзбекистон Республикаси Соғлиқни сақлаш вазирлиги Бухоро вилояти суд тиббий экспертиза бюроси ва Навоий вилояти Шошилинч Тез Тиббий Ёрдам Маркази хулосаларига кўра, милиционернинг зўровонлиги натижасида фуқаро жиддий тан жароҳати олган. Милиция ходими ҳаракатлари учун на жавобгарликка тортилди, ва на ишидан четлатилди. Аксинча, барзангидай милиция ходимига "қўл кўтаргани”, давлат хизматчисининг қонуний "буйруғига бўйсунмагани” учун Садоқат Ҳайдарованинг ўзи ҳуқуқбузар, деб топилди. Хонадон вакиллари бир йилдан бери мамлакат Президентидан тортиб, прокурорларигача шикоят ёзади, аммо ҳамма мамлакат осойишталигининг тимсоли бўлган милиция тарафида! 29 яшар Садоқат Ҳайдарова эса бу воқеалардан сўнг бироз савдойи бўлиб қолган.
«Касалманд» ва руҳий тушкун қизининг изтироблари хусусида пойтахтдаги давлат ҳокимияти органлари эшигини қоқаётган онаизор Ҳадиқа Ҳайдаровага қизининг калтакланиши ажабланарли ҳол эмаслиги, ҳуқуқни муҳофаза қилиш органлари ҳозирда бу каби муомала усулларини қонунбузилиши ҳисобламаётганини тушунтира олмадим” дейди ҳуқуқ фаоли А. Ташанов. Ҳатто тергов даврида жинсий зўровонлик қурбони бўлган аёллар аламини ичига ютишдан нарига ўта олмаяпти. Боиси опа-сингил Соатовалар мисолида бундай жиноятларни хаспўшлаган прокуратура воизи Сенатнинг суд-ҳуқуқ масалалари қўмитаси раиси лавозимига кўтарилиб кетяпти-да. Марказий Осиёнинг энг таъсирли 10 нафар аёли сафидан ўрин оляпти-да.
Афтидан, бизнинг ҳукуматимиз раҳбари зўровонлик масаласида Ўтинбоева даражасида ҳам муаммони тан олмоқчи эмас. Шундай экан, қийноқлар, зўровонликлар давом этаверади. Фуқаролар Қурбонов каби зўравонларнинг қурбони бўлаверади...
№Эзгулик» жамияти бу хусусда Республика прокуратураси, Адлия Вазирлиги, ИИ Вазирлиги рахбарларига расман мурожаат этиб, жойлардаги юлдузсевар зўравонларнинг ушбу ноинсоний хатти харакатларига чек қўйилишини талаб қилади ва уларга нисбатан Ўзбекистон қонунчилиги доирасида зарур чораларни кўришга чақиради.
Ўзбекистон инсон ҳуқуқлари "Эзгулик” жамияти
Vasila Inoyatova
Human Rights Society of Uzbekistan "Ezgulik”
Tashkent-11, Navoi st. 7/403
phone: (+998 97) 131-48-72
(+998 71) 241-85-88
skype: vasilauz
www.ezgulik.org
|
