АҚШ БМТнинг Инсон ҳуқуқлари бўйича кенгашидан чиқди
 АҚШнинг БМТдаги элчиси Никки Хейли.
Қўшма Штатлар БМТнинг Инсон ҳуқуқлари бўйича кенгашидан чиққанини билдирди. АҚШнинг БМТдаги элчиси Никки Хейли 19 июнь куни бунга кенгашда ислоҳотлар олиб борилмаётгани ҳамда Исроилнинг Фаластиндаги сиёсати доимий равишда танқид қилиб келинаётгани сабаб бўлганини айтди. Хейлининг фикрича, кенгаш Куба, Россия, Хитой, Миср, Венесуэла каби давлатларда инсон ҳуқуқлари бузилаётганига кўз юмган ҳолда Исроил фаластинликларга зўравонлик қилаётганини муҳокама этмоқда. АҚШдаги инсон ҳуқуқлари ташкилотлари Дональд Трамп маъмуриятининг бундай қароридан афсус билдирди. АҚШ 2006 йилда ташкил этилган Инсон ҳуқуқлари бўйича кенгаш ишида аввалданоқ иштирок этишдан бош тортган эди. Фақат Барак Обама президентлиги давридагина АҚШ мазкур кенгашга аъзо бўлган. Ўтган ҳафтада ахборот агентликлари АҚШ ва БМТ ўртасида Инсон ҳуқуқлари бўйича кенгашни ислоҳ қилиш юзасидан олиб борилган музокаралар самарасиз якунланганини хабар қилган эди.
|
