Маҳкама жараёнининг илк куни ёпиқ эшиклар ортида ўтган

Москвада 15 яшар ўқувчи қизнинг номусига тажовуз қилиш ва уни ўлдиришда гумон этилган Ўзбекистон фуқароси устидан маҳкама жараёни бошланган.

Шаҳар прокуратурасининг билдиришича, Россияда фаррошлик билан шуғулланган 32 яшар самарқандлик Фарҳод Турсунов ўзига қўйилаётган айбловларни қисман бўйнига олган.

Ўз навбатида айбланувчининг ҳимоячиси мижозининг айбсиз эканлиги ва унинг жиноят содир этмаганлигини билдирган.

Ҳодиса тафсилотлари

Россиялик масъулларга кўра, 15 ёшли Анна Бешнованинг жасади ўтган йилнинг октябр ойида кеч тунда ўз уйи яқинида топилган.

Тергов маълумотларига асосан, Анна Бешнова ярим тунда севгилисининг уйидан қайтаётган пайтда зўрланган ва кейин бўғиб ўлдирилган.

Москвадаги мухбиримизнинг хабар беришича, айни жиноий иш билан боғлиқ маҳкама жараёни Россияда катта шов-шувларга сабаб бўлмоқда.

Маҳкама жараёни

Анна Бешнованинг иши бўйича маҳкама жараёнининг биринчи куни ёпиқ тарзда ўтган. Суд залига фақат айбланувчи Фарҳод Турсунов, унинг ҳимоячиси, таржимони ва қурбоннинг ота-онаси киритилган, холос.

Билдирилишича, марҳумнинг балоғатга етмаганлиги инобатга олиниб, бу каби қарорга келинган.

Прокурор Фарҳод Турсуновга қарши Россия Жиноят Кодексининг 105, 131 ва 132-моддалари бўйича “Одам ўлдириш” ва “Жинсий зўравонлик” айблари қўйилганини ўқиб эшиттирган.

Бундан кейин сўз олган айбланувчи ўзига қўйилган айбловларга қисман иқрор эканини айтган.

Айбловлар қандай далилларга асосланган?

Россия ҳуқуқ-тартибот идораларига кўра, Фарҳод Турсунов Анна Бешнова ўлдирилганидан уч ҳафта ўтиб, ушбу жиноятни содир этганлик гумони билан ҳибсга олинади.

Уларнинг билдиришларича, ДНК текшируви(генетик экспертиза) жиноятни Фарҳод Турсунов содир этганлигини тасдиқлаган.

Дастлабки тергов жараёнида Фарҳод Турсунов Анна Бешнова ўлдирилган кун жуда кўп ароқ ичгани ва ўша куни нима иш қилганини хотирлай олмаслиги, ҳушёр бўлган тақдирда ҳеч қачон бундай жиноятга қўл урмаган бўлишини айтган.

Кузатувчиларга кўра, агар маҳкама Фарҳод Турсуновни айбдор деб топса, у 8 йилдан 20 йилгача ёки бир умрлик қамоқ жазосига ҳукм этилиши мумкин. Ҳозирча маҳкама жараёни давом этмоқда.

Шов-шувга сабаб воқеа

Ушбу воқеа Россия жамиятида катта шов-шувларга сабаб бўлган. Ҳодисанинг эртаси куни воқеа юз берган Москванинг Можайск ҳудудида маҳаллий аҳоли ва миллатчи гуруҳлар, “Москвани муҳожирлардан тозаланг!” деган чақириқлар билан намойишлар ўтказишган.

Москва шаҳри ва вилоятида кетма-кет кўча тозаловчи фаррошларни калтаклаш ва ўлдириш ҳоллари юз бергани айтилади.

Ўтган йилнинг декабр ойида маҳаллий милиция ходимлари Анна Бешнова ўлдирилган жойда боши танасидан жудо қилинган тожикистонлик меҳнат муҳожирининг боши топилганини билдиришганди.