"Афғонистонда инсоний талофатлар сони камайтирилиши лозим"

АҚШнинг Афғонистондаги бўлажак қумондони инсоний талофатлар камайтирилмас экан, исёнкорларга қарши урушни бой беришлари мумкинлигини айтган.

Генерал Стенлей МакКристал (Stanley McChrystal)нинг таъкидлашича, АҚШ ва НАТО бошчилигидаги кучлар сабаб бўлган инсоний талофатлар афғон халқини ўзларидан бегоналаштириши мумкин.

Сенаторлар қаршисида чиқиш қиларкан, АҚШ генерали ,"бу ҳал қилувчи нуқта бўлиши мумкин"лигини билдирган.

Ўз навбатида Американинг "Нью Йорк Таймс" (New York Times) газетасида чоп этилган мақолада айтилишича, ҳарбийлар томонидан олиб борилган тергов ишлари Афғонистондаги АҚШ кучлари томонидан май ойида уюштирилган ҳаво ҳужумларида хатоларга йўл қўйилгани ҳақидаги хулосага келган.

Мақолада исму шарифи келтирилмаган юқори мартабали америкалик ҳарбий мулозимдан иқтибос келтирилишича, "Америка қўшинлари 4 май куни Афғонистон ғарбидаги ўнлаб тинч фуқароларнинг қурбон бўлишига олиб келган айрим ҳаво ҳужумларини уюштиришда жиддий камчиликларга қўл уришган".

Инсоний талофатлар Афғонистонда норозиликларга сабаб бўлиб, АҚШ ва афғон ҳукуматлари орасига рахна солиб келаётган масалалардан биридир.

Афғон ҳукумати америкаликларнинг ҳаво ҳужумларида 140 киши қурбон бўлгани, АҚШ ҳарбийлари эса уларнинг сони 20-30дан ортмаслигини айтишганди.

АҚШ стратегиясидаги ўзгаришлар

Жорий вақтда АҚШ Қуролли кучлари бирлашган штаби қумондони бўлган генерал Стенлей МакКристалнинг генерал Девид МакКиернаннинг ўрнини эгаллаши кутилмоқда. Ва АҚШ Сенатида ҳозир ушбу масала кўриб чиқилмоқда.

Жаноб МакКристалнинг янги лавозимга тайинланиши АҚШ Афғонистондаги аскарлари сонини кўпайтириб, у ердаги стратегиясини ҳам ўзгартиришга ҳозирлик кўраётган бир паллага тўғри келаётир.

Генерал МакКиернаннинг қумондонлик даври Афғонистонда зўравонликларнинг кучайиши билан кечди.

АҚШ Мудофаа вазири Роберт Гейтснинг айтишича, янги генералнинг тайин этилиши афғон муаммосига нисбатан "янгича фикрлаш ва янгича қарашга" замин яратади.

Генерал МакКристал, "керагича заҳира, вақт, қурбонлик ва сабр-тоқат бўлса, афғон урушида ғалаба қозонишлари"ни билдирган.

Унинг огоҳлантиришича, агар АҚШ ва унинг иттифоқчилари ўз вазифаларини уддалай олишмаса, бу Афғонистон фуқаролар уруши гирдобига ботиши ва "ал-Қоида" мамлакатдан ўз базаси сифатида фойдаланишига олиб келиши мумкин.