Жиззахлик деҳқонларнинг гаровга олиш амали
|
|
Эгамназар Шайманов 2005 йилда Жиззахдаги фермерларнинг ҳуқуқларини ҳимоя қилгани учун дўппосланган |
Жиззах вилоятининг Арнасой туманида иш ҳақини ололмаган ва томорқасидан маҳрум бўлганини айтаётган етмишдан ортиқ ишчи маҳаллий
фермер хўжалиги раҳбарини гаровга олган.
"Тошкент - Шайҳонтохур" фермер хўжалиги раҳбари Олия Алиқулова туман ҳокими билан музокаралардан сўнг қўйиб юборилган.
Зиддиятга маҳаллий ҳокимиятнинг фермер хўжалигига қарашли ерларни қайтадан сотиш қарори сабаб бўлгани айтилмоқда.
Би-би-си билан суҳбатда Олия Алиқулова юзага келган вазиятда ҳокимиятни айблади.
Унинг сўзларига кўра, туман ҳокими фермер хўжалигининг пахта ва буғдой экилган ерларини ноқонуний равишда қорақалпоғистонлик
шоли етиштирувчиларга сотиш ҳақида қарор чиқарган.
"Ваҳоланки,
ҳокимиятнинг ўзи менга нисбатан "ноқонуний равишда шоли эккан" дея
жиноят иши очтирган ва ўн бир ойдан буён терговда сўроқ бераяпман", -
дейди фермер аёл.
Алиқулованинг айтишича, унинг қўл остидаги етмиш беш нафар ишчи ҳокимиятнинг ноқонуний амаллари қурбони бўлган.
"Фермер хўжалиги очилиб-ёпилаверганидан мен ишчиларга маошини беролмадим", - дейди у.
Олия Алиқуловага кўра, ҳозирда ишчиларнинг ёйишга нони йўқ.
"Уларга томорқа қилиб берган эдим ва шу ердан кун кўришаётганди, энди томорқалари ҳам тортиб олинмоқда",- дейди фермер.
Норозиликлар
Арнасойдаги гаровга олиш ҳодисаси жиззахлик деҳқонларнинг биринчи норозилик амали эмас.
2005
йил мартида Дўстлик туманида фермерларнинг ҳуқуқларини ҳимоя қилган
инсон ҳуқуқлари фаоли Эгамназар Шаймановнинг калтакланишидан ғазабга
келган икки юзга яқин фермер милиция идораси ва ширкат хўжалиги
биноларини ёқиб юборган эди.
Ҳодиса ортидан ҳудудга ҳарбийлар киритилган.
Ўтган йили ҳукуматнинг кичик фермер хўжаликларини қўшиб юбориш ҳақида чиқарган қарори Жиззах ва бошқа ҳудудларда фермерларнинг
норозиликларига сабаб бўлган.
Аграр давлат бўлган Ўзбекистон аҳолисининг катта қисми қишлоқ хўжалигида банд.
Кузатувчилар ҳукуматнинг қишлоқ хўжалигида ислоҳотларни амалга оширмагани мамлакат аҳолисининг турмушини янада оғирлаштириб
юборганини айтадилар.
|