Ҳуқуқ ҳимоячи Фарҳод Мухторовни беш йилга озодликдан маҳрум этдилар
Нашр қилинди: 04 октябр, 2009 йил
Жиноят ишлари бўйича Тошкент шаҳар Юнусобод туман судида 2 октябрь
куни рўйхатдан ўтмаган “Ўзбекистон Инсон ҳуқуқ ҳимоячилари альянси”нинг
аъзоси Фарҳод Мухторовнинг иши бўйича якуний мажлиси бўлиб ўтди. Уни
қаллобликда ва уюшган гуруҳ манфаати йўлида пора беришда айбладилар.
Ҳуқуқ ҳимоячининг хотини эрига ёрдам бериш учун судга даъвогарларга
аталган беш миллион сўм (Марказий банк курси бўйича 3330 доллар) олиб
келди. Ҳуқуқ ҳимоячининг рафиқаси суд залининг ўзида даъвогар
Содиқбековага пулни берди. Аммо судга раислик қилувчи пулларнинг
ҳаммасини давлат фойдасига мусодара қилди.
Фарҳод Мухторов ўзининг сўнгги сўзида Шоира Содиқбековадан 5 миллион
доллар қарз олмаганини, аммо оиласи ва болалари учун ўша пулни тўлашга
тайёрлигини билдирди. У суддан иккита вояга етмаган боласи ва ишлай
олмайдиган касал хотинини эътиборга олиб ўзини озодликдан маҳрум
этмасликни сўради.
Гарчи Мухторовнинг айбини исботловчи далиллар бўлмасада, суд уни беш
йил озодликдан маҳрум этишга ҳукм чиқарди. Ҳуқуқ ҳимоячи ҳукмга рози
эмас ва унинг устидан шикоят бермоқчи.
Фарҳод Мухторов 2009 йил 17 июль куни Юнусобод туман ИИБ жиноят қидирув
бўлими ходимлари томонидан Юнусобод прокуратураси биносида ҳибсга
олинган. Бу ерга у ИИБ ходимларининг ҳаракатлари устидан шикоят қилгани
келганди. Уни ҳибсга олишларидан аввал ҳуқуқ-тартибот идораларига уч
киши ариза берган: Шоира Содиқбекова, Маъсуда Каримова ва Анвар Эшонов.
Улар ҳуқуқ ҳимоячининг катта миқдорда қарз бўлиб қолганлари ҳақида
таъкидлагандилар. Кейинчалик, Каримова ва Эшонов ҳуқуқ-тартибот
идораларининг босими остида Мухторовга туҳмат қилганларини тан олдилар
ва ўз аризаларини қайтариб олмоқчи бўлдилар.
Мухторов ҳамкасбларининг таъкидлашларича, тергов давомида унга нисбатан
қийноқлар қўлланган. Оқибатда унинг соғлиғи кескин тарзда ёмонлашган.
|
