Ташкилотга кўра, инсон ҳуқуқлари ҳимоячиси Евгений Жовтис кескин танқидий чиқишлари учун илгарилари ҳукумат томонидан таъқиб остига олинган.

Human Rights Watch жаноб Жовтис юритган фаолият туфайли бўлажак маҳкама жараёни сиёсий тус олиши мумкинлигидан хавотирда эканини маълум қилган.

Қозоғистон Халқаро инсон ҳуқуқлари қўмитасининг раҳбари Евгений Жовтис йўл ҳаракати қоидасини бузганликда айбланмоқдаи.

26 июль куни катта йўлда ёш йигитни уриб кетишда айбланаётган Евгений Жовтис эртага бошланадиган маҳкамада 5 йил қамоқ жазосига ҳукм этилиши мумкин.

Айблов хулосасига кўра, жаноб Жовтис Олма-ота вилояти йўлларидан бирида тунда ўзининг шахсий автомобилида бораётиб, Қанат Молдабоев исмли шахсни уриб юборган.

Айблов хулосасида шунингдек қарама-қарши томондан келаётган машина чироқлари Евгений Жовтис кўриш қобилиятини сусайтиргани таъкидланган.

Тергов жараёнида Евгений Жовтис йўловчини урмасликка ҳаракат қилгани, аммо уддасидан чиқа олмаганини эътироф этган.

Терговчи хуласаларига кўра, ҳалокат вақти Жовтиснинг қонидан алкоголь моддалари топилмаган ва ҳайдовчи ҳаракатланиш тезлиги меъёрини бузмаган.

Жабрланувчининг оиласи эса Жовтисдан ҳеч қандай даъвоси йўқлигини маълум қилган.

Human Rights Watch ушбу ишда сиёсий аралашув бўлиши мумкинлигидан хавотир билдиради.

27 июль куни жиноий иш очилади ва унда Жовтис гувоҳ ҳамда воқеани суриштиришда ҳамкор сифатида кўрилади.

28 июль куни эса уни гумондор деб топишади. Бироқ бу ҳақда Жовтис ва унинг адвокати икки ҳафта ўтиб хабардор этилади.

Қозоғистон қонунлари бўйича кимдир бирон нарсада гумон қилинса, терговчи бу ҳақда ўша заҳотиёқ билдиришга масъул.

Евгений Жовтис Қозоғистондаги таниқли инсон ҳуқуқлари ҳимоячиси сифатида маълум.

У раҳбарлик қиладиган Халқаро инсон ҳуқуқлари қўмитаси фаолияти қийноқларга қарши курашиши, қочқинлар ва болалар ҳуқуқларини ҳимоя қилиш ҳамда маҳбуслар
шарт-шароитларини яхшилашни талаб қилишга қаратилган.