Инсон Ҳуқуқлари Жамиятининг хабар беришича, Ғайбулло Жалилов ўтган шанба куни кеч соат ўнларда, жамиятнинг Қарши шаҳар бўлими раиси Нодир Аҳадовнинг уйидан ифторликдан қайтаётган пайтда икки милиция ходими ва фуқаро либосида бўлган бир неча шахс томонидан ҳибсга олиниб, номаълум йўналишга олиб кетилган.

Ғайбулло Жалилов ҳибсга олинган маҳалда унинг ёнида инсон ҳуқуқлари фаоли Санжар Қораев бўлган ва у ҳодиса ҳақида Ғайбулло Жалиловнинг яқинларини хабардор қилган. Инсон Ҳуқуқлари Жамияти Қарши шаҳар бўлими раиси Нодир Аҳадов ҳамкасбининг ҳибсга олинишини шундай тасвирлади:

"Ғайбулло Жалилов Санжар билан хайрлашиб, сал нарироқдаги велосипедини миниши билан икки машина жуда катта тезлик билан ўтган. Кейин машиналар тўхтаган ва ичидан икки нафар формали ва олти нафар фуқаро кийимидаги одамлар тушишган. Улар Ғайбуллони қўлини қайириб, машинага солиб олиб кетишган".

Нодир Аҳадовга кўра, у ҳозир Қарши шаҳар Ички ишлар бўлимида қамаб қўйилган дея тахмин қилиш мумкин. Аммо, ҳозиргача уни бирон ким билан учрашишига рухсат берилмаган.

Ҳозирча унга қандай айблов қўйилгани аниқ эмас. Аммо, ҳамкасблари унинг диндорлиги учун ҳибсга олинган бўлиши мумкинлигини тахмин қилишади. Инсон Ҳуқуқлари Жамияти Қашқадарё бўлими бошлиғи Гулшан Қораева Тошкентда мустақиллик байрами арафасида юз берган қуролли зўравонликлардан кейин Қашқадарёда диндорлар ва мухолиф қарашдаги одамларни ҳибсга олишлар кучайганини айтади:

"Ўйлашимча, уларга диний мотивлар қўйиб қўйишлари ҳеч гап эмас",-дейди Гулшан Қораева.