| Яманда ўғирланган ўзбек фуқароси озод этилди
Россия ташқи ишлар вазирлиги ва Яман расмийларининг маълум қилишларича, маҳаллий қабила томонидан ўғирлаб кетилган ўзбекистонлик
шифокор қисқа муддат тутқинликдан сўнг қўйиб юборилган.
Бир
қатор ахборот агентликлари Яман хавфсизлик хизмати расмийларининг
мамлакат шарқидаги Мариб вилоятида Шаъфа қабиласи вакиллари шифокорни
ўтган ҳафта пайшанба куни ҳибсда ушлаб турилган қабиладошларига алишиб
олиш мақсадида олиб қочганлари ҳақидаги сўзларини келтирганлар.
Аввалига
Яман расмийлари шифокорни Россия фуқароси эканлигини айтганлар, аммо
кейинчалик Россия ташқи ишлар вазирлиги шифокорнинг Ўзбекистон фуқароси
бўлганлигини маълум қилди.
Хабар
агентликларига кўра, Марибдаги қабила раҳбарлари шифокор мусулмон
биродарлари эканлиги аён бўлганидан сўнг қўйиб юборилганлигини
айтганлар.
Яманда
хорижий фуқароларни ўғирлаб кетиш ҳоллари тез-тез юз бериб туради.
Маҳаллий қабилалар кўпда ҳукумат томонидан ён босишларга эришиш учун бу
каби амалларга қўл урадилар.
Кузатувчилар
мамлакатда марказий ҳукумат назорати заифлиги ва маҳаллий қабилалар
жойларда ўз назоратларига эга эканликларини айтишади. Охирги йилларда
"Ал-Қоида" аъзоларининг мамлакатда бошпана топиб, фаолият олиб
бораётганликлари айтилади.
Охирги икки йил ичида 14 хорижий сайёҳ ўлдириб кетилган ва бу амалларда "Ал-Қоида" аъзоларининг қўли борлиги тахмин қилинади.
Яман Яқин Шарқдаги энг қашшоқ мамлакатлардан бири бўлиб, яқин тарихда бир қатор ички урушларга саҳна бўлган.
Яманда ишлаш ва хавфсизлик вазияти ҳақида
Уч йилдан бери Ямандаги хусусий шифохоналардан бирида ишлаётган ўзбекистонлик шифокорнинг Би-би-си билан суҳбатда айтишича
мамлакатда мингга яқин ўзбекистонлик мутахассис ишлайди.
Улар Яманга асосан Россия Соғлиқни сақлаш вазирлиги ва хусусий ширкатлар орқали тузилган контрактлар асосида келишади.
Улар ҳам давлат қарамоғи остидаги ва ҳам хусусий шифохоналарда ишлашади.
Ўртадаги воситачи ишга ёлловчи ширкатлар билан эса кўпда Интернет орқали боғланилади.
Шифокорнинг айтишича, мамлакатга келгандан кейин икки-уч ой мобайнида аста-секин араб тилини ҳам ўрганиб, беморлар ва маҳаллий
ҳамкорлар билан бемалол сўзлашишга ҳам эришадилар.
Бериладиган маошлар кундалик ҳаётга етарли, баъзи ҳолларда ойига минг АҚШ долларига қадар
маош оладилар. Бундан ташқари ҳар бир ўтказилган амалиёт учун ойлик маошнинг ўн фоизи миқдорида мукофот пули ҳам берилар экан.
Уй-жой ва жиҳозлар ишга ёллаган касалхона ёда клиника томонидан берилади.
Хавфсизлик
масаласига келсак, кафолат шифохона раҳбариятида, дейди шифокор. Ҳар
бир шифохона махсус қўриқчилар томонидан қўриқланар экан
| 
