Хориждаги ўзбекистонлик диндорлар томонидан ташкил этилган "Таянч" инсон ҳуқуқлари жамияти фаоли ва жамият веб саҳифаси муҳаррири Муҳаммадсолиҳ Абутов bbcuzbek.com ўқувчилари ва тингловчиларимизнинг саволларига жавоб беради.

Муҳаммадсолиҳ Абутовга саволларингизни саҳифамизнинг ўнг томонидаги махсус форма орқали ёки uzbek@bbc.co.uk электрон манзилимизга йўлланг.

40 ёшли Муҳаммадсолиҳ Абутов 1990-1992 йиллар ичида Андижонда таниқли уламо Абдували қори Мирзаевдан диний сабоқ олган.

Қорақалпоғистонга қайтгач икки йил давомида Тўрткўл шаҳридаги "Аламли Бобо" масжидига имомлик қилади.

1996 йил январ ойида масжид Қорақалпоғистон ҳуқуқ тартибот органлари томонидан ёпилади ва Муҳаммадсолиҳ Абутов, одам ўлдиришга уриниш ва ҳукуматнинг мансабдор мулозимига тазйиқ ўтказиш дохил Ўзбекистон жиноят кодексининг 5 моддасида
айбланиб, ҳибсга олинади.

Айни йилнинг июл ойида Қорақалпоғистон Олий Суди "Аламли Бобо" масжиди имомини 7 йилга озодликдан маҳрум этади.

Муҳаммадсолиҳ Абутов Нукус, Товоқсой ва Навоий жазони ўташ муассисаларида жами 8.5 йиллик қамоқ жазосини ўтади.

У озодликдан маҳрум этилган йилларида муттасил қийноққа тутилганини айтади.

2004 йилнинг май ойида озодликка чиққан жаноб Абутов яна ярим йил уй қамоғида ўтиради.

У "жазо муддати тўлиқ тугагач" Қозоғистонга меҳнат муҳожири сифатида йўл олганини айтади.

Қозоғистонда экан Ўзбекистон ҳуқуқ тартибот органлари томонидан унга нисбатан "конституциявий тузумга тажовуз қилиш ва экстремистик гуруҳ" тузиш айбловлари қўйилади.

Муҳаммадсолиҳ Абутов "яна қамоққа олиниш хавфини сезгач, Россияга йўл олдим," дейди.

2007 йил 13 июнида Ўзбекистон Миллий Хавфсизлик Хизмати ходимлари томонидан Москвада қўлга олинади.

Бироқ халқаро ва маҳаллий инсон ҳуқуқлари ташкилотлари босими остида 2008 йил 31 июнида Москва вилоят суди қарори билан озодликқа чиқарилади ва унга БМТ томонидан бошпана изловчи мақоми берилади.

Муҳаммадсолиҳ Абутов шу йил феврал ойидан буён Швецияда яшамоқда.

Би-би-си меҳмони саволларингизга ҳам интернет ва ҳам радио орқали жавоб беради.

Суҳбатнинг радио версиясини шанба кунги "Дараклар" дастурида тинглай оласиз.

Саволларини радио учун ўз овозлари билан беришни истаган тингловчиларимиздан ўзларининг телефон рақамларини ҳам ёзиб юборишни сўраймиз.

Рукнимизнинг кейинги меҳмонлари кимлар бўлишини истайсиз?

Бу ҳақдаги фикрларингизни кутиб қоламиз.