Саудияда қатъий Шариат қонунлари амал қилади

Ўзининг жинсий ҳаёти ҳақида телевидениедаги ток-шоуда оғиз кўпиртириб гапирган саудиялик эркак беш йиллик қамоқ жазосига маҳкум этилган.

Бу ҳақда Мазен Абдул Жаводнинг ҳимоячиси маълум қилган.

Саудия маҳкамаси, аҳлоқсизликда айбланган Мазен Абдул Жаводни, шунингдек, 1000 дарра уришга ҳукм этган.

Унинг ҳимоячиси ҳукм устидан шикоят этишини айтган.

Шу йил июлида шоуни намойиш этган Ливанда жойлашган LBC телеканалининг Саудиядаги идораси ўтган ой ёпиб қўйилган.

Шоуда Жиддадаги уйида суратга туширилган Абдул Жавод аёлларни қандай қилиб танлаши ҳақида гапирган ва "секс ўйинчоқлар"ни намойиш этган.

Араб дунёсининг энг анъанадор жамиятларидан бўлган Саудия Арабистонида никоҳдан ташқари жинсий алоқа ноқонуний ҳисобланади.

32 ёшли, тўрт фарзанднинг отаси бўлган Абдул Жаводнинг чиқиши юзасидан 200га яқин саудияликлар шикоят қилишган ва уни жазолашга чақириқлар янграган.

Абдул Жаводнинг ўзи кейинроқ кечирим сўраган ва телеканал продюсерлари уни алдов йўли билан баъзи нарсаларни айтишга ундаганларини айтган.

"Балогардон"

Абдул Жаводнинг ҳимоячиси Сулаймон Жумайенинг айтишича, Абдул Жавод билан бирга шоуда қатнашган яна уч кишига икки йилдан қамоқ жазоси берилган.

Ҳимоячининг сўзларига кўра, уларнинг маҳкум этилиши нотўғри ва иш жиноий эмас, балки матбуот масалаларида ихтисослашган маҳкамада кўрилиши керак эди.

Менинг мижозимни одамларга балогардон қилиб кўрсатишди, аслида ҳақиқий айбдор LBC телеканали эди", деб айтган ҳимоячи Франс-Пресс хабар агентлигига тақдим этилган баёнотда.

Саудия Арабистонида Шариат қонунлари амал қилади. Қонунни бузган фуқаролар жазоланади.

Ичкилик ёки никоҳдан ташқари жинсий алоқа дарра уриш ва ё қамоқ билан жазоланади.

Мухбирларга кўра, маҳаллийлар ва хорижликлар томонидан қонунни бузиш ҳоллари кўплаб содир этилади, аммо ҳамма сукут сақлайди ва "ёпиғлиқ қозон ёпиқлигича" қолишига умид қилади.