Душанбедаги матбуот анжуманида гапирган бош прокурор Бобожон Бобохоновнинг айтишича, айни вақтда бир неча йил аввал фаол бўлган бошқа таъқиқланган ташкилотлар фаолияти, жумладан "Ҳезбут-таҳрир" фаолияти, сустлашган ва ҳозирда деярли кузатилмайди.

Жаноб Бобохоновга кўра, дастлаб Ўзбекистоннинг ўзида ва Ўзбекистоннинг Тожикистон билан чегарадош ҳудудларида фаол бўлган "Ўзбекистон Исломий ҳаракати" аъзолари кейинчалик Тожикистон ҳудудига сизиб криришган.

"Ҳозирда уларнинг сони кам эмас. Исфара тумани, Хўжанд ва Душанбе атрофларида ҳозир ҳам мавжудлар",-деди Тожикистон Бош Прокурори.

Унга кўра ҳаракатнинг баъзи аъзолари хорижда тайёргарликдан ўтиб келганлар ва уларнинг сони йилдан-йилга кўпайиб бормоқда.

Бош Прокурорнинг айтишича "Ўзбекистон Исломий ҳаракати"нинг кўплаб аъзолари охирги йилларда ҳибсга олинган ва жиноий жавобгарликка тортилган.

Жаноб Бобохонов Тожикистонда қўлга олинган "Ўзбекистон Исломий ҳаракати" аъзолари сони ҳақида аниқ маълумотларни айтмади, аммо прокуратурадаги бошқа манбалар уларнинг сони "ўнлаб" эканлигини билдирдилар.

Тожикистон Бош Прокурори радикал диний ташкилотлар аъзоларига қарши курашда Ўзбекистон томони билан ҳамкорлик деярли йўқлигини таъкидлади. Унга кўра, Тожикистон томони Ўзбекистон талаб қилган жиноят содир этган шахсларни Ўзбекистонга топширади, аммо ЎЗбекистон томони Тожикистоннинг бу каби талбаларини жавобсиз қолдиради.