Би-би-си мухбири Эҳром либоси ва кутилмаган тошқин ҳақида
Лайли Абулҳасаний
Би-би-си, Жидда
|
Ҳаж зиёратига ҳар йили 2-2.5 миллион мусулмон боради |
Би-би-си мухбири Лайли Абулҳасаний бу йилги Ҳаж зиёратини ёритаётган журналистлардан бири.
У ўзининг иккинчи лавҳасида Эҳром либослари ва кутилмаган сув тошқини ҳақида ҳикоя қилади.
Биз бугун Эҳром (Ҳаж пайтида кийиладиган либос - Би-би-си изоҳи) либосини кийдик.
Бўлғуси ҳожиларни аввалига эҳром либосларини қаердан сотиб олиш мумкинлиги, кейин эса уларни қандай кийиш зарурлиги хавотирга
солганди.
Эркаклар эҳром либоси икки парча матодан иборат. Улар зиёрат пайтида шу либосда юришлари керак.
Эҳром либосини қандай кийиш зарурлиги ҳақида Саудия Ахборот Вазирлиги махсус йўриқномалар тарқатган эса-да, эркаклар ўзларини
бир оз ноқулай ҳис қилишади.
Аёл ҳожилар оддий либос кийсалар ҳам бўлаверади. Аммо оқ либосда бўлишлари афзалроқ.
Эҳромга киришда ман қилинган яна бошқа нарсалар ҳам бор. Агар тартибга риоя қилмасангиз, жазоланасиз.
Одамларга қўпол муомалада бўлиш, кўп гапириш, баҳслашиш ёда бошқалар кўнглини оғритиш ман этилган амаллар жумласига киради.
Аммо журналистларга бу осон эмас. Бошқалар билан гаплашмаган, баҳслашмаган, тортишмаган журналист, журналистми?!
Баҳслашиш - касбимиз моҳияти, айниқса интернет секин ишласа, суратларни, аудио ва видео лавҳаларни ҳамда мақолаларни интернет
орқали жўнатиб тура олмасак.
Лекин Эҳромда баҳслашиш ва норози бўлиш мумкин эмаслигини унутмаслик керак.
Бу галги Ҳаж зиёратида ҳаммани хавотирга солган муаммо чўчқа гриппи эди. Сув тошқини ҳақида ҳеч ким ўйламаганди.
Бугун Жиддада сув тошқинидан камида 8 одам вафот этди.
Қурбонлар ё машиналари ичида қолиб кетишган ёда шаҳар жанубидаги эски уйларда яшашган.
Улар орасида ҳожилар бўлмаган.
Биз
Жиддадан Маккага, сўнгра Арафотга бугун соат тушликдан кейинги
иккиларда йўлга чиқишимиз керак эди. Аммо сув тошқини йўлларни беркитиб
қўйгани туфайли туриб қолдик.
Хабарларга кўра, Арафотда ҳам кучли ёмғир ёққан. Ҳаж ташкилототчилари ёмғирдан ивиган гиламлар ва чодирларни ўзгартиришаётган
экан.
Эртага барча зиёратчилар Арафот саҳросида ибодат қилишади
|