Янги эмлик 2010 йилдан истеъмолга чиқарилади

Қозоғистон чўчқа ва қуш тумовига қарши ўз вакцинасини ишлаб чиққан.

Синовдан ўтказиш учун Жаҳон соғлиқни сақлаш ташкилотига юборилган ушбу вакцина келаси йилнинг апрелидан бошлаб истеъмолга чиқиши маълум қилинган.

Расмийлар эмлаш воситасини ишлаб чиқиш жараёни муваффақиятли якунига етганини айтишмоқда.

"Вакцина ишлаб чиқаришнинг технологияси ва тавсифномаси Жаҳон соғлиқни сақлаш ташкилоти тавсияларига тўлиқ мос келади, -дейди Таълим ва фан вазирлиги матбуот хизмати вакили Лаура Арисбекова Би-би-си билан суҳбатда.

Бу билан Қозоғистон чўчқа томовига қарши вакцина ишлаб чиққан 5 давлатдан бири бўлди.

Вазирлик берган маълумотларга кўра, ушбу вакцинани ишлаб чиқиш учун ҳукумат 3 миллион АҚШ долларига яқин маблағ сарфлаган.

Вакцина клиник синовдан ўтиш учун Россия илмий тадқиқот институтида жойлашган Жаҳон соғлиқни сақлаш ташкилотининг тумов маркази лабораториясига юборилган.

Ушбу икки вакцина келаси йилнинг апрел ойидан бошлаб ишлаб чиқаришга қўйишили мўлжалланаётир.

Қозоғистонлик олимлар Refluvac деб номланадиган чўчқа тумовига қарши вакцинанинг келажаги мувафаққиятли бўлишига ишонишмоқда.

Янги вакцинанинг нархи мавжудларидан 40 фоизга арзон бўлиши кутилаётир.

Мамлакат бош санитар шифокори Кенес Оспановнинг айтишича, вакцина истеъмолга чиқиши билан келгуси йил тумов мавсумигача аҳолининг 10 фоизини эмлаш режаланмоқда.

Айни дамгача дунёда чўчқа тумови билан оғриётганларнинг умумий сони 500 мингдан ошиб кетган.

Соғлиқни сақлаш вазирлиги берган маълумотларга кўра, Қозоғистон ҳудудида шу кунларда 15 киши чўчқа тумовидан даволанмоқда.