| Халқаро ташкилот журналист ўлимидан ларзага тушган
 |
|
| Павлюк ўлими Қирғизистондаги русийзабон журналистлар билан охирги ҳафталарда юз берган учинчи кўнгилсиз ҳодиса |
"Чегара билмас мухбирлар" ташкилоти қирғизистонлик журналист Геннадий Павлюк ўлимидан ҳаддан зиёд ларзага тушганини билдирди.
22 декабр куни Алмати шаҳридаги шифохонада таниқли мухолифатчи журналист Геннадий Павлюк ҳушига келмасдан вафот этган.
У 16 декабр куни Алматининг Фурманов кўчасидаги кўп қаватли бинонинг олтинчи қаватидан ташлаб юборилганидан кейин оғир аҳволда
шифохонага ётқизилган эди.
Қозоғистон Ички ишлар вазирлиги журналистнинг қўл ва оёқлари боғланиб, баландликдан ташлаб юборилганини тасдиқлаган.
Хабарларга кўра, Геннадий Павлюк Қирғизистондан Қозоғистонга 16 декабр куни борган.
"Чегара билмас мухбирлар" халқаро ташкилоти таниқли журналист билан рўй берган ҳодиса атрофида қатор саволлар очиқ қолаётганини
таъкидлаган, хусусан, унинг нега Алмати шаҳрига боргани номаълум қолмоқда.
Халқаро ташкилот Павлюк ўлими Қирғизистондаги русийзабон журналистлар билан охирги ҳафталарда юз берган учинчи кўнгилсиз ҳодиса
эканини эслатган.
9 декабр куни Бишкекда сиёсий таҳлилчи Александр Князев калтакланган, 15 декабр куни Россиянинг "Балтинфо" ахборот агентлиги
Александр Евграфовга таҳдид бўлган.
Геннадий Павлюк президент Асқар Акаев раҳбарлиги пайтида "Аргументы и факты" рўзномасининг Қирғизистондаги нашрига муҳаррирлик
қилган.
Журналист
2005 йилдаги "Лола инқилоби" ортида қудратга келган янги ҳукуматга
кескин танқидий муносабатда бўлган, Ибрагим Рустамбек тахаллуси остида
"Комсомолская правда" рўзномасининг қирғиз нашрини бошқарган.
Геннадий
Павлюк муҳаррирлик қилган "Белый пароход" рўзномаси Қирғизистондаги
энергетика ширкатларининг хусусийлаштирилишига алоқадор коррупция
ҳоллари ҳақида чиқишлар қилган, таҳририят ходимлари ўзларига нисбатан
босимлар кучайганидан шикоят қилишган.
Марҳум журналист охирги пайтда Қирғиз мухолифатининг "Ота макон" рўзномаси ва унинг интернет саҳифасини нашр этишни режалаган.
Унинг шу мақсадда Қозоғистонга борган бўлиши эҳтимоли ҳам билдирилмоқда.
Халқаро "Чегара билмас мухбирлар" ташкилоти таниқли журналист ўлими муносабати билан Қозоғистон ва Қирғизистон расмийларига
мурожат қилган.
"Қозоғистоннинг
Оврўпода Хавфсизлик ва Ҳамкорлик ташкилотига раислигига 10 кун қолганда
рўй берган қотилликнинг жазосиз қолишига Қозоғистон расмийлари йўл қўя
олмайдилар ва бу жиноятни фош этишда Қирғизистон расмийлари ҳамкорлик
қилишлари зарур", дейилади "Чегара билмас мухбирлар" ташкилоти эълон
қилган баёнотда
| 
