Ўзбек адабиёти ва маданияти катта йўқотишга учради

21 декабр куни Ўзбекистон Халқ ёзувчиси Одил Ёқубов 84 ёшида оламдан ўтди.

Одил Ёқубовнинг вафоти билан ўзбек адабиёти ва маданияти катта йўқотишга учради.

Одил Ёқубов ўзбек адабиётида ўз ўрнини қолдирган адиб, йирик жамоат арбоби ва бағрикенг инсон сифатида барчанинг ёдида қолади.

Одил Ёқубов ўзининг илк қиссаси - "Тенгдошлар" билан китобхонлар эътиборига тушган эди.

"Улуғбек хазинаси" романи Одил Ёқубов ижодининг ёрқин босқичи сифатида эътирофга сазовор бўлди, бир неча тилларга таржима қилинди.

Буюк ўзбек олими ва давлат арбоби Улуғбекнинг фожеали тақдиридан ҳикоя қилувчи роман асосида видеофильм тасвирга олинган.

Ва айнан "Улуғбек хазинаси" романи учун Одил Ёқубов Ҳамза номидаги Республика Давлат мукофотига сазовор бўлган.

Одил Ёқубов ҳозирги Қозоғистоннинг Чимкент вилоятида 1926 йилда таваллуд топган.

У Ўрта Осиё Давлат университетининг филология факультетини 1956 йилда тамомлаган.

Одил Ёқубов Ўзбекистон Ёзувчилар уюшмасида маслаҳатчи, "Литературная газета" мухбири, "Ўзбекфильм" киностудиясида, Ғафур Ғулом нашриётида хизмат қилган.

"Ўзбекистон адабиёти ва санъати" рўзномасининг энг кўп адади 1 миллионга етган йиллари Одил Ёқубовнинг бош муҳаррирлиги даврларига тўғри келган эди.

1987-1989 йилларда "Ўзбекистон адабиёти ва санъати" "ўзбекнинг дардини юзага чиқарган минбарга айланганди" - Орол денгизининг қуриши, Бўстонлиқда атроф-муҳитга зарар етказадиган завод қурилишига қарши жамоатчилик фикрини шакллантириш, пахта яккаҳокимлиги, Шўро армиясидаги "дедовшина" муаммолари илк бор матбуот юзини кўрганди.

Одил Ёқубовнинг Ўзбекистон Ёзувчилар уюшмасига раислиги уюшманинг мамлакатдаги илк демократик ҳаракатлар бешигига айланишига шароит яратган эди.

Одил Ёқубов қатор йиллар Ўзбекистон Атамалар қўмитасини бошқарди.