Хитой ўтган июль ойи Шинжон-Уйғуристони пойтахти Урумчида кечган миллий низоларда қатнашишга оид айбловлар билан яна беш кишини ўлим жазосига ҳукм этган.

Ўлимга ҳукм этилган бешовлон ҳам уйғур миллатига мансуб.

Жами 22 киши айбланган ушбу маҳкама жараёнида қолган судланувчиларга узоқ йиллик қамоқ ва шартли ўлим жазолари белгиланган.

Маҳкама жараёнлари жорий ҳафта давомида Урумчи шаҳрида ўтган. Бироқ мулозимлар судланувчиларга айнан қандай абловлар қўйилгани борасида бирон маълумот беришгани йўқ.

Фақатгина мазкур маҳкама ва ҳукмлар июлдаги миллий низоларга боғлиқлиги маълум, холос.

Воқеаларнинг келиб чиқиши Хитой жанубидаги Гуандон вилоятида жойлашган бир корхонадаги зўравонликка бориб тақалади.

Ўшанда уйғур ишчилари ҳақидаги миш-мишлар ортидан хан хитойликлар бир неча уйғурни калтаклаб ўлдиришади.

Кейинчалик бу хабар Шинжон-Уйғур бўлгасига ҳам етиб келади ва кўп сондаги уйғурлар норозилик билдириб кўчаларга чиқишади.

Хитой расмийларига кўра, норозилик билдирган уйғурлар ўз-ўзидан хан хитойликлар ва уларнинг тижорат ҳамда мулкларига ҳужум қилишган.

Бироқ уйғур фаоллари буни рад этишади.

Аммо орадан икки кун ўтиб, Шинжондаги хан хитойликлар ҳам уйғурларга қарши зўравонлик амалларини бошлашади.

Зўравонликлар давомида аксар хан хитойликлардан иборат 200 нафар одам нобуд бўлган.

Мухбирларга кўра, мазкур ғалаён ханлар ва уйғурлар орасидаги муносабатлар қанчалик танг эканлигини намойиш этган.

Кейинчалик, сентябрь ойида ҳам Шинжон-Уйғуристони норозилик намойишларига саҳна бўлди.