Нужод мажбурий турмушдан қутулиб, мактабга қайтишга муваффақ бўлди

Яманлик мактаб ўқувчиси Нужод тўққиз ёшида 30 ёшар кишига турмушга чиқарилган ва бир йил ўтар-ўтмай ажрашган.

Нужод 10 ёшида ўз тақдирини ўз қўлига олишга қарор қилган ва ўз ташаббуси билан ажрашув жараёнини бошлаган.

Турмушга чиқаётган куни у ҳатто ўз тўйи бўлаётганини ҳам аввалдан билмаган.

Отасининг рухсати билан уни ўз қишлоғига олиб кетган кишининг оиласи катта тўй маросимини ташкил қилган.

Тўй тугагач, Нужод маросимдан кетаётган меҳмонлардан уни уйига олиб бориб қўйишларини сўраган, бироқ янги эри унга энди шу оилада қолишини уқтирган.

Янги қишлоқда у уй ишлари билан машғул бўлиб бир неча кунни ўтказган, бироқ йиғлаб-сиқтаб ялинишлари ортидан эрининг оиласи уни ота-онасига қайтарган.

Нужод отасига мактабни якунлашни исташини айтган, бироқ отаси бунга изн бермай, эрига қайтиб боришни буюрган.

Нужод икки марта қочиб кетишга уринган, ва ҳатто тоғаларининг уйларида яширинган, лекин отаси ва акалари келиб уни яна топиб олганлар.

Маҳкама

	Нужод университетга киришни орзу қилади

Эрининг уйига қайтиши арафасида Нужоднинг ўгай онаси унга, агар ажрашиш нияти бўлса, маҳкамага мурожаат қилишни маслаҳат берган ва Нужод эртаси тонгдаёқ маҳкамага йўл олган.

Нужод уйда отаси, онаси, ўгай онаси ва акаларининг йўқлигидан фойдаланиб, маҳкамага автобус ва таксида етиб олган.

Дарвозадаги аёл навбатчи унинг ҳикоясини эшитгач, ҳакамнинг идорасига бошлаган.

Нужод ҳакамга эридан ажрашишни истаб келгани, мактабни якунлашни ва ўз оиласи билан яшашни хоҳлашини айтган.

Ҳакам Нужодни ўз оиласига олиб кетган. Нужод у ерда ўтказган уч куни давомида ҳакамнинг оиласидан фақат яхшилик кўрганини айтади.

Ҳакам сўнгра уни бир одам қўшиб оиласига жўнатган. Унинг ота-онаси уйда бўлмаганлари учун, Нужод уйдаги опасига маҳкамага ажрашишни сўраб мурожаат қилганини айтиб, яна маҳкамага қайтган.

Унинг тоғаларидан бири Нужодни олиб кетиш учун маҳкамага келган.

Нужоднинг отаси ва эри маҳкамага келганларида, улар ҳибсга олинганлар. Ота 10 кунга, эр эса 15 кунга қамоққа ташланган.

Бир неча ҳафтадан сўнг ҳакам Нужоднинг ажралгани борасида қарор чиқарган. Унинг эри ҳам ҳакам қарорини эшитиш учун маҳкамага олиб келинган, бироқ у Нужодга бирон нарса демаган.