Отишма насронийлар Исо Мавлуди кечасида Наж Ҳаммадий шаҳридаги черковда ярим тунги ибодатни ўтказиб чиқаётганларида юз берган.

Автомобиль черков қаршисида тўхтаб, оломонга қарата ўт очган.

Расмийларга кўра, ҳужум ўтган ноябрь ойида 12 ёшар қизнинг насроний киши томонидан жинсий зўрланишига қарши ўч олиш амали бўлган бўлиши мумкин.

Жинсий зўрланиш ҳоли ортидан Наж Ҳаммадий шаҳрида беш кун тартибсизлик рўй бериб, насронийларнинг уйларига ўт қўйилган ва уларнинг мол-мулки катта шикаст кўрганди.

Полиция чоршанба кунги отишмада гумон қилинган асосий шахсни аниқлаганини, аммо ҳозирча ҳеч ким ҳибсга олинмаганини билдирди.

Ҳудудда вазият ўта танг экани ва янги тўқнашувлар юз бергани хабар қилинмоқда.

Черков руҳонийси Кироллос Исо Мавлудидан бир неча кун олдин таҳдидлар олгани, шунинг учун ҳам Исо Мавлуди ибодатини бир соат олдинроқ якунлаганини айтди.

"Бир неча кундан бери мен Исо Мавлуди кечасида бирон нарса юз беради деб кутгандим," - деб айтган у.

Руҳоний ҳужумдан атиги бир неча дақиқа аввал черковдан чиқиб кетганини билдирди.

"Бир автомобиль ёнимдан кескин бурилиб ўтиб кетди, ва мен орқа эшикка шайландим. "Дарвозада бир киши билан қўл бериб кўришаётганимда, бақириқ-чақириқ, автоматдан отилган кўп ўқ овозларини эшитдим," - деди Епископ Кироллос.

Ҳужумда жароҳат олган 10 киши орасида икки мусулмон йўловчи ҳам бўлган.

Наж Ҳаммадий шаҳри Миср жанубидаги энг катта шаҳар бўлмиш Луксордан 64 чақирим узоқликда жойлашган.

Мисрнинг 80 миллионлик аҳолисининг 10 фоизини ташкил қиладиган қибтий насронийлар таҳқирлашлар ва камситишлардан шикоят қилишган.

Баъзи қибтийлар ўзларига қилинган аввалги ҳужумлар жазосиз қолгани ёки енгил жазога лойиқ деб топилганинини айтишади.

Мисрдаги аксар насронийлар қибтийлардир. Қибтий насронийларнинг илдизи қадимий мисрликларга бориб тақалади.

Исонинг табиати борасидаги келишмовчиликлар туфайли эрамизнинг 451-йилида қибтий насронийлар Шарқий Православ ва Рим Католикларидан ажралиб чиқишган.