Зўравон миршаблар текширувдан ўтади - 9 Февраля 2010

Тошкентдаги тергов изоляторида ўндан ошиқ милиционер томонидан зўрланган сурхондарёлик Райҳон Соатова боласининг отаси кимлигини аниқлаш юзасидан ДНК анализи бўйича экспертиза ўтказиладиган бўлди.

Бу ҳақда Озодликка Райҳоннинг акаси Абдусамад Соатов маълум қилди.

- Менга Мирзо Улуғбек туман прокурутура терговчилари айтишди. Улар: "20 кун ичида ҳаммаси ҳал бўлади, биз боланинг отаси кимлигини аниқлаш учун гумондор одамлардан қон намунаси олдик”, дейишди. Гумондор одамлар деганда ўша куни опа-сингилларимни қўлга олишда иштирок этган Мирзо Улуғбек туман Ички ишлар бўлими ходимлари, яъни 12 милиционер ва май ойида синглим соткасидан телефон қилган шахсларни назарда тутишаяпти. "Ўшалардан қон намунаси олдик, 20 кун ичида аниқлаб берамиз”, дейишди.
Бу жараён учун ҳам вақт керак экан. Ҳадича Сулаймонова номидаги суд-экспертиза бошқармасида текширилар экан, дейди Абдусамад Соатов.

Тергов давомида зўрланган опа-сингил Соатовалар воқеасини кузатиб келаётган "Эзгулик” жамияти ҳам "Тошкент шаҳар прокуратураси терговчиси Азиз Рустамбоев маҳкума ва жинсий зўровонликда айбланаётган гумондорлардан қон олиниб, ДНК анализи учун махсус экспертизага юборилганини таъкидлади”, дея хабар қилади.

Опа-сингил Соатовалар 2009 йилнинг 9 майида Тошкент шаҳар Мирзо Улуғбек туман Ички ишлар бўлими ходимлари томонидан ҳибсга олинган.

Миршаблар томонидан зўрлангани айтилаётган опа-сингилларнинг ўртанчаси Райҳон Соатова акасига уни Мирзо Улуғбек туман ички ишлар бўлимида 12 киши номусига тажовуз қилгани ҳақида гапириб берган.

Аввал хабар қилганимиздек, Райҳоннинг қизи ўтган йилнинг 17 декабр куни муддатидан аввал 29 ҳафталик пайтида туғилди.

Агар ҳисоб-китоб қилинса, Райҳоннинг ҳибсга олинганидан кейин ҳомиладор бўлгани маълум бўлади.

Абдусамад Соатовнинг Озодликка маълум қилишича, у Ўзбекистон адлия идорасидан синглиси Райҳонни тергов давомида зўрлаган милиция ходимларига нисбатан жиноий иш қўзғатилгани ҳақида расмий билдиришнома олган.

Абдусамадга кўра, ушбу билдиришномада Тошкент шаҳар Мирзо Улуғбек тумани Ички ишлар бўлими тезкор-қидирув бўлимининг бир гуруҳ ходимларига нисбатан Жиноят кодексининг 118-моддаси (Номусга тегиш) бўйича жиноий иш очилиб¸ тергов-суриштирув ишлари бошлангани ҳақида ёзилган.

Сурхондарёлик уч опа-сингил Наргиза, Райҳон ва Хосият Соатовалар Тошкентда аввалига безориликда айбланган¸ кўп ўтмай эса босқинчига чиқарилган ва маҳкамага тортилган эди.

Суд ҳукмига мувофиқ, Райҳон Соатова 7 йилу икки ойлик қамоқ жазосига маҳкум қилинган. Унинг опаси Наргиза ҳам Зангиота туман аёллар колониясида жазо муддатини ўтаяпти. Кичик синглиси Хосият эса суд ҳукмига кўра айбдор деб топилиб, 6 йилу икки ойлик қамоқ жазосига ҳукм қилинган. Лекин суд ушбу ҳукмни шартли жазо билан алмаштириб, Хосиятни озод қилган.

Мавзу тафсилотлари билан кун давомида танишасиз.

http://www.ozodlik.org/content/article/1952480.html