Кўпроқ хоразмлик аёллар ўз жонларига қасд қилишмоқда Uznews.net
19.02.10 – "Нажот” ҳуқуқ ҳимояси ташкилотининг билдиришича, Хоразм вилоятида
аёллар орасида ўзини ўзи ўлдириш ҳолатлари кўпаймоқда.
"Нажот” ташкилоти йиққан маълумотларга кўра 15 дан 22 ёшгача бўлган уч
нафар ёш қизлар, 2010 йилнинг биргина январ ойида ўз жонларига қасд
қилишган.
14-январда Хоразм вилоятининг, Хива тумани Чинобод қишлоғида яшовчи,
икки нафар фарзанднинг онаси, 22 ёшли Наргиза Оллаберганова ўз уйида
ўзини осган.
Суициднинг аниқ сабаби аниқланмаган, дея ёзади "Нажот”, бироқ
Оллабергановани билган шахсларга кўра, ўз жонига қасд қилишга уни
оиладаги жанжаллар ва зўровонлик ундаган.
Хоразм вилоятининг Хива тумани Ғоюқ кўл мавзеида яшовчи Маҳлиё
Раҳимбоеванинг худкушлик қилишига сабаб оиладаги моддий етишмовчилик
муаммолари бўлган.
Бошқа бир ёш қиз, январ ойида ҳаётдан кетган 16 яшар Юлдуз Ибрагимова ҳам Хива туманида яшаган.
"Нажот”нинг билдиришича, у ўлдирадиган миқдорда уйқу дориси – димедрол
истеъмол қилган. Уни ҳам ўзини ўлдиришга мажбур қилган сабаблар
оиладаги моддий муаммолар бўлган.
"Нажот” ташкилоти, Хоразм вилоятида суицид холатлари ўсаётганлиги ва
бунинг асосий сабаби, Ўзбекистонда анъанавий бўлган маиший зўровонлик
ва бунга мустақиллик йиллари қўшимча бўлароқ кириб келган қашшоқлик ва
моддий тангликдир.
Расмий Ўзбекистон республикадаги суицидлар миқдорини яшириб келади.
Ушбу муаммога оид сўнгги маълумотлар 1989 йилларга тааллуқлидир, у
пайтда ҳали СССР тирик эди, бу маълумотларга кўра, ўша йили
Ўзбекистонда 270 нафар аёл ўзини ўзи ўлдирган.
"Бироқ, афсуски, бу билан ҳудкушликлар миқдори камаймайди. Бундан
ташқари ижтимоий иқтисодий аҳволнинг танглашуви, халқнинг умумий
қашшоқлашуви, аксарият одамлар руҳиятидаги бузилишлар, айниқса қишлоқ
ҳудудларида ўз жонига қасд қилиш ҳолатларининг кўпайишига сабаб бўлади,
бундан энг аввало, энг нозик ижтимоий қатлам бўлган – аёлларга зиён
етади”, - дея ёзади Хайитбой Ёқубов, "Нажот” раҳбари.
"Мустабид жамиятларда суицид бўйича статистика жамоатчилик учун ёпиқ
бўлган маълумотлар сирасига киради, чунки бу каби маълумот, ҳукумат
томонидан ўз фуқаролари ҳуқуқларини қанчалик ҳурмат қилиши ва
таъминлаётгани ўлчови ҳисобланади”, - дея қўшимча қилади у.
|
