Тиғ тортма.

Йиғлайди булутлар, йиғлар Андижон,
Бекордан бекорга берилганга жон.
Кимлардир беҳаёт, кимдир чалажон,
Ўзлигинг ўзинга тиғ тортма элим.

Портласа Бухоро, пойтахт Тошкентим,
Не-не ситамларга дучор бошкентим.
Қўлларга иссиқ нон берган ошкентим,
Ўзлигинг ўзинга тиғ тортма элим.

Ким ўзи бир-бирин беаёв отган,
Ким ўзи миллатни манфаатин сотган.
Ким ўзи нохаклик жабрини тортган,
Ўзлигинг ўзинга тиғ тортма элим.

Бариси миллатим жоним ўзбекдир,
Ўзича ўзига амир хон бекдир.
Дилларда негадир адоват кекдир,
Ўзлигинг ўзинга тиғ тортма элим.

Йиглайди булутлар юртим жонажон,
Бекордан бекорга берилганга жон.
Кимлардир беҳаёт, кимдир чалажон,
Ўзлигинг ўзинга тиғ тортма элим,
Ўзлигинг ўзинга ўқ отма элим.

Руҳиддин Комилов.

Миллатим уйғон.

Бу дунёга кимлар келиб ким кетмаган,
Одамзотга молу-дунё хеч етмаган.
Туркий бўлиб таркликни тарк этмаган,
Эй миллатим уйғон энди гафлатдан тур!

Амир Темур, Алишерлар ўтмиш энди,
Боязид-у, барлос шерлар ўтмиш энди.
Мақтанишмас асл эрлар ўтмиш энди,
Эй миллатим уйғон энди гафлатдан тур!

Аждодларинг гўрларида тик турмасин,
Болаларинг боши эгик ҳам юрмасин.
Келажагинг Орол каби қуримасин,
Эй миллатим уйғон энди гафлатдан тур!

Бефарқлигу-лоқайдликни қилма одат,
Адолатдан афзал эмас ҳеч ибодат.
Хурфикирнинг натижаси бу саодат,
Эй миллатим уйғон энди гафлатдан тур!

Шеърларимни битдим асл шерлар учун,
Белларида белбоғи бор эрлар учун.
Туркийзамин деб аталмиш ерлар учун,
Эй миллатим уйғон энди гафлатдан тур!

Руҳиддин Комилов.

Пресс-центр: "Ўзбекистонда ҳалол ва адолатли сайловлар учун” жамоат бирлашмаси.