Тошкентлик собиқ терговчи, милиция майори
Александр Чернишев даъво қилишича, Ички ишлар вазирлиги биносида алоҳида
қийноқ камераси мавжуд ва бу камера шахсан Зокиржон Алматовнинг
назорати остида бўлган.
Собиқ милиция майори, шунингдек, президент
эътиборини, ўз таъбирича, инсон ҳуқуқларини ҳимоя қилиш борасида
Ўзбекистон конституцияси ва бошқа қонунлар поймол этилаётганига
қаратган.
Нафақахўр Александр Чернишевнинг Президент
Каримовга йўллаган очиқ хатида ёзишича, қийноқ камераси Ички ишлар
вазирлигининг Тошкентдаги ҳовлисида, ҳавони совутиш учун қурилган бир
қаватли иморат ичкарисида жойлашган.
Би-би-си билан суҳбатда Александр Чернишевнинг
ўзи бу камерани кўрмаганини айтди.
Александр Чернишевнинг айтишича, собиқ турмуш
ўртоғини 1997 йилда икки кун ўша хонада сақлашган.
Би-би-си жаноб Чернишевнинг иддаолари юзасидан
Ўзбекистон Ички ишлар вазирлиги масъуллари билан боғланишга ҳаракат
қилди, аммо шарҳ ололмади.
Тошкентдаги Ички ишлар вазирлиги ертўласида
маҳбусларнинг қийноққа солиниши ҳақидаги хабар янгилик эмас, инсон
ҳуқуқлари ташкилотлари қийноқ ва ҳатто ўлим ҳолатларини ҳам
ҳужжатлаштиришган.
Ўзбекистонда диний-сиёсий айблаб, қамашган ва
ҳозирда Оврўпода яшаётган собиқ маҳбуслардан бирининг ҳикоясидан
англашилишича, махсус қийноқ камералари ҳақиқатан ҳам мавжуд.