Дуня Миятович ўзбек журналистларига бўлаётган тазйиқлардан хавотирда эканини айтган
Оврўпода Хавфсизлик ва Ҳамкорлик Ташкилотининг матбуот эркинлиги бўйича вакили Дуня Миятович Ўзбекистонда журналистларга қарши давом этаётган таъқиб ва тазйиқларни қоралаб чиққан.
Миятович хоним ўзбек ҳукуматига йўллаган мактубида анча кескин сўзларни қўллаган. У Ўзбекистондаги мустақил журналистларга қарши бўлаётган босимни "шафқатсиз" дея тасвирлайди ва бундан хавотирда эканини айтади.
Миятович хоним Ўзбекистон Ташқи Ишлар Вазири Владимир Норовнинг эътиборини икки журналист тақдирига қаратишга уринган. Булар АҚШ томонидан молияланувчи Америка Овози радиосининг штатдан ташқарида ишловчи мухбири Абдумалик Бобоев, ҳамда рус тилидаги Vesti.uz интернет саҳифасининг бош мухаррири ва Россиянинг Парламентская Газета рўзномасининг Марказий Осиё бўйича мухбири Владимир Березовскаялардир.
Бобоевга қарши бир қатор айбловлар, хусусан туҳмат, ҳақорат, давлат чегаралари қонунларини бузиш, ҳамда жамоат тартиби ва хавфсизлигига таҳдид солувчи материалларни ишлаб чиқариш ва тарқатиш бўйича жиноий иш очилган ва ўз маҳкама ишини кутмоқда. Россия фуқароси бўлган Березовский эса туҳматда айбланиб, маҳкамага тортилиши кутилаётир.
"Бобоев ва Березовскийларнинг иши Ўзбекистонда матбуот эркинлиги билан боғлиқ вазият абгорлашиб боришда давом этаётганига яна бир ишорадир, ва мен ҳукуматни бу тенденцияни ортга қайтаришга чақираман," - дейди Миятович хоним ўз мактубида.
Оврўпода Хавфсизлик ва Ҳамкорлик Ташкилоти расмийси мактубида, шунингдек, Ўзбекистонда олти ва 12 ярим йил ўртасида қамоқ жазоларини ўтаётган уч журналистнинг тақдирини яна бир бор кўтариб чиққан.
Абдумалик Бобоев ўзига қарши қўйилган барча айбловлар асоссиз дейди
Улар - мустақил журналист Дилмурод Саййид, АҚШ томонидан молияланувчи Озодлик радиоси ва uznews.net интернет саҳифасининг собиқ мухбири Солижон Абдураҳмонов, ҳамда Чемпион спорт рўзномаси бош муҳаррири Ҳайрулло Хамидовлардир.
"Журналистлар, Оврўпода Хавфсизлик ва Ҳамкорлик Ташкилотининг матбуот эркинлиги бўйича мажубриятлари ва тамойилларига биноан, ўз профессионал фаолиятларини тўсиқларсиз амалга оширишда эркин бўлишлари кераклигини ўзбек расмийларига эслатиб қўйиш менинг бурчим," - Миятович хоним мактубида.
Ўзбекистонда расман цензура йўқлиги ҳукумат томонидан эълон қилинган эсада, матбуот давлатнинг қаттиқ назорати остида.
Ўзбекистонда хорижий оммавий ахборот воситаларига хабар етказувчи мухбирлар ва мустақил журналистлар экстремизм, туҳмат, таъмагирлик, ва ёки уларнинг профессионал фаолиятига мутлақо алоқаси бўлмаган айбловлар, хусусан Солижон Абдураҳмонов мисолида каби, гиёҳванд моддалар сотиш каби айбловлар билан овози ўчирилади.
