'Америка овози' мухбири Абдумалик Бобоев жарима билан қутилди
Журналист Абдумалик Бобоев ўзига қўйилаётган айбловларни тан олмаганди
Бугун Тошкентда бўлиб ўтган
якуний маҳкама жараёнида "Америка овози" радиоси мухбири Абдумалик
Бобоевга Ўзбекистон Жиноят Кодексининг 223-моддаси бўйича қўйилган
айблов бекор қилиниб, қолган учта модда бўйича 400 минимал иш ҳақи (18
миллион 86 минг сўм) миқдорида жарима солинди.
Малик Мансур тахаллуси билан "Америка овози"
радиосининг Ўзбек хизмати билан ҳамкорлик қилган Абдумалик Бобоевга
Ўзбекистон жамоат хавфсизлиги ва тартибига таҳдид соладиган
материалларни тайёрлаш ва тарқатиш, туҳмат, ҳақорат ва чегарани
ноқонуний кесиб ўтиш бандлари бўйича айбланганди.
Ўзига қўйилган барча айбловларда айбдор деб
топилган тақдирда, журналистнинг 5 йилдан 8 йилгача қамоқ жазосига ҳукм
этилиши кутилганди.
Абдумалик Бобоев тергов жараёнида ўзига қарши илгари сурилган айбловларни тан олмаганди.
Журналистнинг ишини яқиндан кузатиб бораётган
ўзбекистонлик инсон ҳуқуқлари ҳимоячилари ҳам унга қўйилаётган
айбларнинг сохта эканини айтишганди.
Абдумалик Бобоевнинг маҳкама иши халқаро миқёсда кескин акс-садоларга сабаб бўлганди.
Жумладан, "Хьюман Райтс Вотч"нинг бугун чиқарган
баёнотида айтишича, ҳукуматни танқид этувчи қарашларни изҳор этгани
учун журналист Бобоевга бу каби айбловлар қўйилган.
Халқаро ташкилот Ўзбек расмийларини журналистга қўйилган айбларни зудлик билан олиб ташлашга ҳам чақирганди.
"Чегара билмас мухбирлар" ташкилоти эса,
Абдумалик Бобоевнинг илк маҳкама жараёни ортидан чиқарган баёнотида
унинг иши бошдан-оёқ сиёсий важларга асосланганини баён қилганди.
Журналист Абдумалик Бобоевнинг маҳкама жараёни 7 октябр куни бошланганди.
13 октябр куни эса, "Парламентская газета" ва
Вести.Uz веб саҳифасининг муҳаррири В.Березовский "туҳмат" ва "ҳақорат"
қилишда айбдор деб топилган, аммо авф эълон этилиб, жиноий
жавобгарликдан соқит этилганди.
Биз Ўзбекистондаги диний ва сиёсий
маҳкамаларни кузатиш лойиҳаси раҳбари Суръат Икромов билан боғланиб,
сўнгги хабар тафсилотларини сўрадик.
