Брюссельда Европа Комиссияси биноси ёнида пикет бўлиб ўтди

Бельгияда Европа Комиссиясининг Брюссельдаги биноси ёнида бир қатор халқаро ва ўзбек инсон ҳуқуқлари ҳимоячилари томонидан Ўзбекистон президенти Ислом Каримовнинг бу давлатга ташрифига норозилик сифатида пикет ўтди.

Пикет иштирокчилари ЕИ ва айниқса Европа Комиссияси президенти, НАТО раиси ва ҳатто Бельгия ҳукуматини дунёдаги энг ёвуз диктаторни қабул қилаётганини "шармандали ҳаракат” деб баҳоладилар. Пикет иштирокчилари орасида Жараён нашри асосчиси "Ўтюраклар” Клуби инсон ҳуқуқларини ҳимоя қилиш ташкилоти раҳбари Мўътабар Тожибоева, "Марказий Осиёда инсон ҳуқуқлари” Ассоциацияси президенти Надежда Атаева, таниқли мухолифат вакили Сафар Бекжон ҳам бор.

"Мен Яратган эгамдан соғлигим панд бермай мана шу бугун, шу пикетда муносиб туриб беришни сўрагандим, шукур турдим, менишонаманки пикетимизни Европа Комиссияси биносига келган пайт ҳам, кетаётган пайт ҳам диктатор ва унинг кортежи кўрди, жуда ҳам умид қиламанки, минглаб ватандошларимнинг юрагига ваҳима солган бу ёвуз шахс бизнинг пикетдан ва пикетга бўлган Европадаги барча йирик ОАВ ходимлари қизиқишидан довдиради, агар кўзларимиздаги нафратни ҳам кўрганида эди...”, дейди Мўътабар Тожибоева.

Йигирмадан ортиқ киши қатнашган намойиш ҳудди театр драмасидек саҳналаштирилган бўлиб, унда иштирокчилар тобут кўтариб олганлар. Андижон ҳунрезлигида ўқ еган инсоннинг кўйлаги ёпилган тобут устига "Диктатура+Оврўпо Иттифоқи=Андижон" деб ёзилган. Тобут ёнига эса Ўзбекистонда тутқунликда бўлган ва қамоқларда нобуд бўлган сиёсий маҳбуслар ва журналистлар оёқ кийимлари териб қўйилган. Пикет иштирокчилари ўзбек қамоқхоналарида қолаётган Солижон Абдураҳмонов, Дилмурод Саййид, Аъзам Фармонов, Юсуф Жума ва бошқаларнинг оёқ кийимларини Оврўпо Комиссияси президенти Жозе Мануэл Баррозо кийиб кўришини, ортиб қолганларини Ислом Каримовга топширишини айтиб, рамзий ҳолда пойафзалларни Европа Комиссияси томон улоқтиришди.

Пикет ўтаётган бир пайтда, Ислом Каримов Европа Комиссияси раҳбари Жозе Мануэл Баррозо ҳамда ЕИнинг Энергетика масалалари бўйича комиссари Гюнтер Оттингер билан музокара ўтказди. Маълумотларга кўра, учрашув давомида томонларнинг ЕИ ва Ўзбекистон ўртасида энергетика соҳасидаги ҳамкорлик тўғрисидаги ўзаро англашинув меморандумини имзолашлари ва Тошкентда ЕИ ваколатхонасини очиш масалаларини муҳокама этишлари назарда туилган.

Пикетдан ташқари яна бир ҳолат, айтиб ўтиш жоизки Ислом Каримов учун ноҳуш воқеа сифатида қабул қилиниши мумкин, яъни Озодлик радиоси хабар қилишича, одатда Брюселга ташриф буюрган давлат раҳбарлари ЕИ президенти Ҳерман Ван Румпей даражасида қабул қилинади. Лекин маълум бўлишича, Брюсселда Румпей Каримов билан учрашмайди. ЕИ ичкарисидаги манбанинг Озодлик мухбирига айтишича, Каримов билан учрашмаслик қарори жаноб Ван Румпейнинг шахсий, ахлоқий позицияси ифодасидир.

Пикет якуни бўйича иштирокчилар, FIDH (инсон ҳуқуқлари федерацияси), "Ўтюраклар” Клуби Инсон ҳуқуқларини ҳимоя қилиш ташкилоти, "Марказий Осиёда инсон ҳуқуқлари”Ассоциацияси, Human Rights Watch, Amnesty International ташкилотлари томонидан қўшма мурожаати эълон қилинади.

Пикет жойидан олинган суратлар нашримизга FIDH (инсон ҳуқуқлари федерацияси) томонидан тақдим этилди.

Piketdan olingan rasmlar

www.Jarayon.com