АҚШ таниқли инсон ҳуқуқлари фаоли Азимжон Асқаров ва яна етти нафар этник ўзбекнинг ишини кўриб чиқаётган Қирғизистон Олий маҳкамасини ҳуқуқий жараёнларни ҳурмат қилиш ва холис бўлишга ундаган.
Американинг Қирғизистондаги элчилиги ўтган июн ойидаги этник низолар чоғида бир милиция ходимини ўлдириш ва миллий нафрат уйғотишда айбланган судланувчиларнинг ишини яқиндан кузатиб турганликларини билдирган.
Элчилик, ўз ўрнида, Қирғизистон Олий маҳкамасида кечаётган жараёнда аввал инобатга олинмаган ҳужжатларга эътибор қаратилишидан ўз мамнунлигини изҳор этган.
Аммо маҳкама жараёнидаги бошқа ҳолатлардан ўз ташвишларини изҳор этган.
Америка томонига кўра, маҳкама жараёнида милиция зобитлари дохил кўплаб шахсларнинг айбланувчиларнинг шикоят аризаларини рад этишга ундовчи чиқишларига имкон берилган.
Азимжон Асқаров ва бошқа айбланувчиларнинг маҳкама тингловига таклиф этилмагани ва ўз баёнотлари билан чиқишларига имконият берилмагани жараённинг холислигини савол остига қўяди, дейди АҚШ элчилиги.
Мустақил ва халқаро кузатувчилар айбланувчилар устидан бўлиб ўтган бундан аввалги маҳкама жараёнларининг қанчалик адолатли бўлганини савол остига олиб келишади.
Судланувчиларнинг ҳимоячилари ўз мижозларининг қийноқларга ва бошқа номақбул муносабатларга дучор этилганликларини айтишади.
АҚШ элчилигига кўра, айбланувчиларнинг холис ва адолатли маҳкамасини таъминлаш билан Қирғизистон дунёга ўзининг демократик ва эркин жамиятга айланиб бораётганига ишора қилади.
"Хьюман Райтс Вотч" халқаро инсон ҳуқуқларини ҳимоя қилиш ташкилоти ўтган ҳафта Қирғизистон Олий маҳкамасини айни шу маҳкама жараёнида адолатсизликнинг олдини олишга чақирганди.
Айбланувчиларнинг 27 январга режаланган навбатдаги маҳкама жараёни 8 февралга қолдирилган.
Инсон ҳуқуқлари фаоли Азимжон Асқаров ўтган йилнинг сентябр ойида бир умрлик қамоқ жазосига ҳукм этилганди.