Ўзбекистондаги Жаслиқ муассасасида мунтазам равишда қийноқлар қўлланилмоқда
 Ўзбекистондаги Мустақил инсон ҳуқуқлари ҳимоячилари Ташаббус гуруҳи (МИҲТГ) Қарақалпоғистон (Ўзбекистон таркибидаги муҳторият)нинг Жаслиқ қишлоғи ёнидаги айни ном билан танилган муассасада мунтазам равишда қийноқлар қўлланилаётгани ва улар ўта шафқатсиз кўринишда эканини маълум қилди.
МИҲТГ муассасадаги вазиятни уерда сақланаётган маҳбус Икром Илёсов мисолида ёритишга уринган. И.Илёсовнинг онаси Шаҳло Илёсованинг сўзларига таяниб тарқатилган хабарга кўра, у 6 январдан 20 январгача ҳеч бир сабабсиз ШИЗО ҳибсхонасига ташланган, у ерда маҳбусни бошига, оёғига ва танасининг бошқа қисмларига резина дубинка билан уришган. Калтаклаш маҳбус ҳушини йўқотгунига қадар давом этган. Бу ҳақда маҳбуснинг онаси ўғли соғайгач у билан кўришишга изн берилганидан сўнг огоҳ бўлган.
МИҲТГа кўра, яқинда муассаса раҳбари ўзгаргани боис, назоратчилар ҳам янгиланмоқда. Янги келган назоратчилар, маълум бўлишича, эскиларидан мутлақо фарқланмайди, балким янгидан-янги қийноқ турларини кашф этиш билан эскиларидан ўтмоқда ҳам. Икром Илёсов булар ҳақда онаси билан учрашув давомида маълум қилиб, вазият ўта оғирлиги ва маҳбуслар мисли кўрилмаган қийноқларга дуч келаётганини айтган.
Асли тошкентлик бўлган Икром Илёсов 2000 йилнинг март ойида Ўзбекистонда таъқиқланган "Ҳизб ут-Таҳрир” диний ташкилотига аъзоликда айбдор топилиб, 16 йиллик қамоқ жазосига ҳукм этилган. Муайян муддат қамоқ жазосини Зангиота, қийноқлар билан ном чиқарган "Жаслиқ” муассасаси ва Навоий шаҳарларидаги қамоқхоналарда ўтаган. 2005 йилдан эса яна "Жаслиқ” муассасасига қайтарилган ва шу пайтга қадар ўша ерда қолмоқда.
Ўзбекистон дунё жамоатчилиги томонидан инсон ҳуқуқлари писанд қилинмайдиган ва мунтазам равишда қийноқлар қўлланилувчи мамлакат сифатида тан олинган. Мамлакатни сўнгги 20-йилдан буён унинг собиқ коммунист раҳбари 73 ёшли Ислом Каримов бошқариб келади. 2007 йилнинг декабрида Конституциядаги чекловларга қарамай Ислом Каримов учинчи марта президентлик курсисига ўтирди. Жорий йил аввалидан буён ўзбек қамоқхоналаридан беш маҳбуснинг ўлиги чиқди, уларнинг ҳаммаси қийноқлар оқибатида ўлгани айтилмоқда.
www.Jarayon.com
|
