"Янги дунё” Интернет нашри ва унинг мухаррига нисбатан таҳдидлар янграмоқда
 Бугун "Эчкига карамни ишондик” ("Доверили козе капусту”) номли мақола эълон қилингач, мақола "қаҳрамони”, ўзини "Бирлик” партияси "Ёшлар” қаноти раҳбари деб билувчи Анвар Каримов номидан камина - "Янги Дунё” саҳифаси асосчиси ва муҳаррири Юсуф Расулга нисбатан турли таҳдидлар бошланди. Масалан, Швецияда Анвар Каримов номига расмийлаштирилган 0727413989 рақамли телефондан менга тегишли 0739842847 рақамли телефонга қуйидагича таҳдидли СМС лар юборилди. (СМС лар қандай ёзилган бўлса шундай келтирамиз).
1."Siz na fakat meni nafratimni oldingiz. Katta bir sizni xurmat kilgan oilani nafratini oldiz”
2."Uzbekistondagi Pulkanlar omon bulsin endi”.
3.Akangizga ham salom.
4.Sizga nima kotlik qildim. Ishingizni qilmaysizmi. Yozganizi yaxshilab oking u erda sizni obruiz ketgan.
5.Ana endi tuxmat uchun kamataman shveciyada. Menda saytga dostup yok.Material sizni comhemdan koilgan.Menda esa komhememas. Endi karabturkot kolga tushtingsenga shveciyada sudimost olib bermasam.
6.Men kilgan tuxmating uchun kamalasan endi. Makola saklandi. Ertaga tarjimasi bilan polisda buladi. E san kimnidir gapiga lakka tushding. Ular biladiseni fakat men konuniy javobgarlikga tortishga kuchim etadi.
Шу ва шунга ўхшаш дағдаға ва қўрқитишлар. Бу гаплари билан Анвар Каримов умр йўлдошим - Саодат Пўлканованинг оила аъзоларига ва акам Назиржон Расуловга тазйиқ ўтказамиз демоқчими? Ким орқали уларга тазйиқ ўтказмоқда? Анвар Каримов кимга бунча ишонади?
Нега у "Янги Дунё” портали номидан эълон қилинган мақоласида мухолифат фаолларига очиқчасига таҳдид қилмоқда? Қаранг, у нима деб ёзмоқда?
"Янги Дунё” жорий йилда Ўзбекистон, МДҲ, Европа Иттифоқи ва Америкадаги тегишли ташкилотларга бизни ўқувчиларимизнинг ўз ҳамкасблари ёки танишларини фош этиш учун юборилган, ҳали эълон қилинмаган материалларни юборади. !
(«Янги Дунё” в этом году, направит в соответствующие органы Узбекистана, СНГ, Евросоюза и Американского континента, часть неопубликованных материалов присланых нашими читателями в виде компромата на своих коллег, знакомых.”»)
("Интим и Интимные отношения" мақоласидан).
Анвар Каримовнинг таҳририят номидан ёзган бу мақоласини ўқиган одам, "бу боланинг ақли жойидами, у бирор касалликка чалинмаганмикан?” деган хаёлга боради. Ҳақиқатдан, ўзи ёш бўла туриб, мухолифатга тамал тошини қўйган, миллатимиз ва халқимиз келажаги учун курашган кишиларга кимга ишониб таҳдид қилмоқда? Нега у "Янги Дунё” портали номидан эълон килинган мақоласида шундай шантаж сўзларни ёзмоқда?
Анвар Каримов шу йилнинг март ойидан бошлаб "Янги Дунё” билан ҳамкорлик қилиш истагини билдирган эди. Биз уни соф ниятли мухолифатдаги ёшлардан бири, "Бирлик” ҳаракати асосчиларидан бири, ҳаммамиз учун ҳурматли инсон Олим Каримовнинг набираси, қолаверса, ҳуқуқ ҳимоячиси Дилобар Худойберганованинг турмуш ўртоғи деган ўйда фикрларини эълон қилиши учун саҳифамиздан жой бериб келдик.
Ўтган йилнинг ноябр ойида камина автоаварияга учраб оғир тан жароҳати олгач, Анвар тезда етиб келиб ёрдам қўлини чўзди. Эвазига эса ...мухолифатни "фош этувчи” мақолалар уюштира бошлади.
Ўзбекистон махсус хизматлари архивларидан олингани тахмин қилинган унинг бу маълумотлари кўплаб мухолифат фаолларида норозилик уйғотмай қолмади. У бу мақолаларда кўплаб инсонларни, жумладан, Қозоғистондаги ўзбек қочқинларидан бирини ёки "Бирдамлик” лидери Баҳодир Чориевни шахсига тегадиган, ҳақоратли, туҳмат гапларни ёзган эди. Ажабланарлиси, Анвар Каримов ҳар бир мақоласини ўзининг номидан эмас, балки "Янги Дунё” таҳририяти номидан ёзарди. Биз унга эътироз билдирсак, "Қўяверинг, бу сайтни обрўи. Фош қилувчи мақолалар сайт учун керак” дерди. Бунинг сабаби нимада экан? У ўзини ошкор қилишдан бунча қўрқади?
Мана бугунги кунга келиб Анвар Каримовга ишониб, унга саҳифа учун кенг йўл очиб бериб хато ишга йўл қўйганимизни тушуниб етдик. Лекин йўл қўйган хатомизни ҳам хайрли, эзгу мақсад йўлида, яхшиликка йўйса бўлади. Бу мақолалари билан Анвар Каримов ўзини ўзи фош этди. Гарчанд у, таҳририят аъзоси бўлмасада ўзини яшириб "Янги Дунё” таҳририяти номидан ёзиши сабабларини бугун англагандекмиз...
Куни кеча "Янги Дунё” веб саҳифасининг таҳририят аъзолари иш бошлашди. Таҳририят ижодий гуруҳида Алибой Йўляхшиев, Толиб Ёқубов, Абдулазиз Маҳмудов, Тошпўлат Йўлдошев, Абдужалил Бойматов, Гулчеҳра Нуруллаева, Исмат Хушев, Камолиддин Раббимов каби кўзга кўринган мухолифат ва инсон ҳуқуқлари фаоллари, ёзувчи -шоирлар, сиёсий таҳличилар бор. Айни пайтда сафимизга яна кўплаб зиёлилар қўшилиш истагини билдиришмоқда. Мақсадимиз: "Янги Дунё” саҳифасини дунё ўзбеклари ўқийдиган энг мазмунли, очиқ ва холис саҳифага айлантириш.
Кимларнидир буюртмасини бажариб, ўзбек халқининг муборак ҳаракатига рахна солмоқчи бўлган Анвар Каримовнинг қандайдир шубҳали ташкилотлардан маълумотларни олиб, балки ўғирлаб, яширинча бизни сайтимизга жойлаштиришдан кўзланган мақсади албатта бугун бўлмаса эртага очиқланади. Ҳукумат ичида ҳам инсофли, зиёли инсонлар, узоқни кўра билгувчи сиёсатчилар кўп. Албатта, биз улар билан ҳам ижодий ҳамкорлик қилиб боришимиз мумкин. Чунки, ҳукумат идораларида ишласалар ҳам улар халқимизнинг фарзандлари. Шу халқ учун албатта куюнишади. Лекин бошқаларнинг шаъни, қадр-қимматини камситувчи, туҳмат ва ҳақоратларга саҳифамизда жой йўқ.
Биз кимларнидир тергов қилувчи терговчи ҳам, суд ҳам, гап ташувчи ҳам эмасмиз.
"Янги Дунё” ўз номи билан жонажон миллатдошларимиз севиб ўқийдиган янгича, ўзига хос маърифат ташувчи веб саҳифа бўлиб қолаверади!
|
