Франция полицияси муслималарнинг жамоат жойларида бурқада юришларини тақиқловчи қонунга норозилик билдириб уюштирилган кичиккина намойиш чоғида икки аёлни ҳибсга олган.
Намойиш Париждаги Нотердам ибодатхонаси ташқарисида кечаётган бўлган.
Полицияга кўра, икковлон ноқонуний намойишларда иштирок этаётган бўлишган. Аммо улардан бирининг бурқада бўлгани ҳам айтилади.
Францияда бугун кучга кирган янги қонунга мувофиқ, муслималарнинг жамоат жойларида бурқада юришлари бундан кейин жиноят саналади.
Қонунни бузган муслима хотин-қизлар 150 евро миқдорида(217 АҚШ доллари) жаримага тортилишади ва махсус фуқаролик курсларидан ўтишлари лозим кўрилади.
Уларни ниқоб ёки бурқа кийишга мажбур қилганларга эса, бундан ҳам каттароқ миқдорда жарима солинади ва икки йилгача қамоқ жазосига ҳукм этилишади.
Франция муслималарга фарз деб кўрилган исломий бурқани расман тақиқлаган Оврўподаги биринчи давлатдир.
Бугун кучга кирган янги қонунга мувофиқ, франциялик бўладими ёки хорижлик, хотин-қизларнинг жамоат жойларида ниқоб ва ё бурқада юрганликлари аниқланса, полиция уларни тўхтатиб, жарима солишга ҳақли бўлади.
Жарима миқдори оз бўлса-да, у жиддий ўзгаришлардан далолат қилади.
Франция ҳукуматининг айтишича, юзни деярли буткул ёпиб турувчи бурқа баҳамжиҳат жамиятда яшаш учун лозим бўлган энг оддий меъёрларга мос келмайди ва мамлакатда амалда бўлган тенгҳуқуқлилик тамойилларига мувофиқ келмайди.
Янги қонун, ўз ўрнида, Франциядаги мусулмонларнинг ўзлари томонидан ҳам бир хилда қарши олинмаган.
Исломчилар ва эркинлик тарафдори бўлган фаоллар томонидан ўтказилган саноқли намойишлар эса, амалда ҳеч қандай таъсирга эга бўлмаган кўринади.
Аммо ўртага чиқаётган энг оддий савол - Францияда ҳижоб ёки бурқада юрувчи хотин-қизларнинг сони бор-йўғи 2.000 тача бўлган пайтда, бу каби қонунга қанчалик жиддий эҳтиёж борлиги ҳақидадир.
Франция Президенти Николя Саркози танқидчиларига кўра, аҳоли орасида обрўси тўкилиб бораётгани учун мусулмонлар мавзусини кўтариши унга осонлик билан сайловчиларни ўз томонига оғдириб олишда қўл келиши мумкин.
Қатор инсон ҳуқуқлари фаоллари эса, бугун кучга кирган янги қонун - инсон ҳуқуқларининг топталиши эканини айтишади.
Уларнинг урғулашларича, Франция эркинлик ва инсон ҳуқуқлари давлатидир. Ҳамда янги қонуни билан француз ҳукумати ушбу тамойилни ҳурмат қилмаслигини намоён этган.
Фаоллар, ўз ўрнида, бунинг Оврўпо қонунларига ҳам зид амал эканини алоҳида таъкидлашади.
Сиз Франция ҳукуматининг ушбу қарорига қандай қарайсиз? Қандай либосда юриш инсоннинг қонунан ҳимоя қилинган ҳуқуқи бўлган бир шароитда Францияда қабул қилинган бу каби қонунларга нега эҳтиёж бор деб ўйлайсиз?