Қаршиликларга сув келди.
Ўзбекистон Инсон Ҳуқуқлари Жамиятининг (ЎИҲЖ) Қашқадарё вилоят бўлими раиси Гулшан Қораева куни кеча, яъни 27 апрель кунида Президент Ислом Каримов номига очиқ хат тарқатиб, унда Қарши шаҳрида аҳоли сувсиз қолганлигини баён этганди. Бугун эса Қарши шаҳар ҳокимлиги Гулшан Қораеванинг талабини қондирганлиги ҳақида хабар олдик. Аммо қандай усулда қондирилди?
27 апрел куни тонги соат 11 лар атрофида у ташкилотнинг Қарши шаҳар бўлимини бошқариб келаётган ҳуқуқбон Нодир Аҳатов билан Қарши шаҳар сув-оқава ташкилотига боришади ва яқин кунлар ичида норозилик билдириб кўчага чиқишларини ҳам маълум қилишади. Шу мазмунда ёзилган билдириш хатини топширишади. Билдиришнома шу куни Қарши шаҳар ҳокимлигига, ички ишлар бўлимига ҳам юборилади.
Кечки вақтда эса муаммо ҳал бўлган!
"Тахминан соат 21 лар атрофида катта бир сув ташийдиган машинада йигирма тонна тоза ичимлик суви келтиришди”, – дейди ҳайратланган Гулшан, – "Иккки маҳалла, "Кунчиқар” ва "Маҳоллот” маҳаллалари аҳолисига тарқатилинди”.
Қизиқ, шаҳар ҳокимлиги кунора мана шунақа қилиб сув келтирмоқчими, ёки ҳар куни йигирма тонна сув келтириб аҳолига тарқатмоқчими? Шундан кўра, халқнинг норозилигини кўпайтирмай, сувни водорпроводларга қўйиб юборилса арзон тушмасмикан? Ўзбекнинг ҳукмдорларини ҳам, масъулларини ҳам на бирор ўзбек ва на бирор бегона одам тушинмай дунёдан ўтиб кетади.
Яна ажабланарлик томони эса, сув тарқатиш "маросимида” Қарши шаҳар Ички Ишлар Бўлимидан ҳам бир вакил иштирок этган.
"Буниси нима учун эди, тушунмадим”, – ҳайратини яширмайди Гулшан Қораева.
|
