Киммо Килюнен Қирғизистон парламенти қарорини 'афсусли' дея баҳолайди
Қирғизистон парламенти ўтган йилнинг июн ойида юз берган қонли низоларни ўрганиш бўйича халқаро комиссия раиси Киммо Килюненни мамлакатга киришини тақиқлаш юзасидан овоз берган.
Парламентга кўра, халқаро тергов ҳайъатининг айни ҳодисалар бўйича ҳисоботи биртомонлама ва миллий хавфсизликка таҳдиддир.
Қирғиз депутатлари бу боис ҳам Финландия парламенти собиқ аъзоси Киммо Килюнен Қирғизистонда исталмаган шахс эканини айтишган. Улар халқаро комиссия раҳбари Киммо Килюненни нохолисликда айблашган.
Ой бошларида Киммо Килюнен бошчилигидаги халқаро мустақил тергов ҳайъати ўз ҳисоботида Қирғизистон жанубида юз берган қонли зўравонликларни уруш жиноятлари ёки қатлиом сирасига киритмаслиги, аммо 11-13 июн кунлари Ўш шаҳрининг айрим маҳаллаларида уюштирилган муайян ҳужумларни инсониятга қарши жиноят сирасига киритиш мумкинлигини айтганди.
Ҳисоботда айтилишича, Қирғизистоннинг асосан Ўш ва Жалол-Обод шаҳарларида юз берган миллий низолар чоғида ҳар икки томондан ҳам жиддий инсоний талофатлар берилган: 470 га яқин киши қурбон бўлган ва яна минглаб кишиларга тан жароҳати етган. Шу билан бирга ҳисобот хулосаларида жабрланганларнинг аксари ўзбеклар экани айтилганди.
Қирғизистон парламенти эса, 3 май куни эълон қилинган ушбу ҳисоботни тан олмаслигини айтган.
Қирғизистон парламенти мажлисида иштирок этган 96 депутатдан 95 нафари Килюнен жанобларини мамлакатга киритмасликни маъқуллаб овоз берган.
Ҳукумат халқаро комиссия ҳисоботи якунидаги келажакда бундай ҳолларни олдини олишга оид тавсияларини қабул қилган, аммо энди парламент қарорини амалга жорий этиш керакми-йўқлиги юзасидан бир тўхтамга келиши лозим.
Килюнен жанобларининг ўзи Би-би-си билан суҳбатда Қирғизистон парламенти қароридан афсусда эканини айтган.
"Аввало бу мен учун жуда-жуда афсусли ва қайғули хабар. Чунки, Қирғизистон бўйича комиссия мақсади имкон қадар холис таҳлилу тавсиялар билан мамлакатга, миллий ярашув жараёнига ёрдамлашиш эди. Мен ҳисоботга ҳукуматнинг муносабати танқидий бўлганини биламан, аммо улар бизнинг тавсияларимизни қабул қилишганди. Мана шу энг муҳим нарса", дейди у.
