Оврўпо Комиссияси Ўзбекистон Президентининг қизи Лола Каримова-Тиллаева раҳбарлик қиладиган Болаларни ижтимоий мослаштириш Республика марказига 3,7 миллион евро бергани борасидаги хабарларни рад этган.
Комиссия воизи Болаларни ижтимоий мослаштириш Республика марказига грантлар берилмаслиги, фақат техник ёрдамлар кўрсатилишини айтган.
Оврўпо Иттифоқи ушбу хайрия марказига молиявий ёрдам ажратгани хусусида ўтган ой охирларида Лола Каримова-Тиллаеванинг Rue89 Интернет нашрига қарши даъвоси бўйича маҳкама иши жараёнида ошкор бўлганди.
Ўзбекистоннинг ЮНЕСКОдаги элчиси Лола Каримова-Тиллаева француз веб-сайтини ўзини "диктаторнинг қизи" деб атагани учун судга берган.
Лола Каримованинг адвокатлари маҳкама ишида ўз мижозлари Ўзбекистонда қанчалар яхши хайрия амалларига тасдиқ ўлароқ Оврўпо Комиссиясининг Тошкентдаги мувофиқлаштирувчиси Пьер-Пол Антеурисссенс томонидан ёзилган мактубни тақдим қилишган.
Тошкентдаги Оврўпо Уйи мувофиқлаштирувчиси томонидан апрел ойида ёзилган мактубда Оврўпо Иттифоқи Болаларни ижтимоий мослаштириш Республика марказини 3,7 миллион евро миқдорида молиялаши тасдиқлаган.
Британияда нашр этилувчи нуфузли The Telegraph газетаси ҳам бу борада мақола чоп этганди
Оврўпо Уйининг расмий вебсаҳифасида ҳам Лола Каримова-Тиллаевага тегишли Болаларни ижтимоий мослаштириш Республика маркази асосий ҳамкор ва 3,7 миллион евродан асосий фойда кўрувчи сифатида кўрсатилган.
Афтидан, ушбу вебсаҳифа ўтган ҳафта охирларида интернетдан олиб ташланган.
'Фуқаро жамиятни дастаклаш дастури'
Болаларни ижтимоий мослаштириш Республика маркази аллақачон Комиссиянинг Ўзбекистондаги "фуқаровий жамияти"ни дастаклаш дастури доирасида Оврўподаги ноҳукумат ташкилотларидан бирига берилган 154, 998 евро миқдоридаги маблағдан баҳраманд бўлгани айтилади.
Комиссия ривожланиш департаменти вебсаҳифасида айни лойиҳа Оврўпо Иттифоқининг Ўзбекистондаги фаолиятига мисол сифатида урғуланган.
Комиссия воизи эса, бу пуллар Болаларни ижтимоий мослаштириш Республика марказига ёрдам кўрсатишни молиялаш учунгина берилганини таъкидлаган.
Унга кўра, "Ўзбекистонга ёрдам кўрсатиш тузум ёки Каримовнинг қизини дастаклашни англатмайди".
