Швецияда 31 ёшли Мурод Собутов исмли ўзбекистонлик муҳожир қазо қилгани хабар қилинди. Айтилишича, ҳозир марҳумнинг дўстлари уни Швецияда дафн қилиш учун пул йиғишмоқда.

Тошкентлик Мурод Собутов тўққиз кун аввал Стокҳолм шаҳрида ўзи ижарага олган хонадонда жон берган. Унинг юрак хуружидан ўлгани айтилмоқда.

- Мурод акани юраги сал чатоқроқ эди, қон босими доим сакрарди. Ухлаб ётганларида жони узилган,- деди марҳумнинг яқин дўсти Азиз Муҳиддинов.

Собутов 2005 йилда Швецияга тирикчилик учун келган ва турли қора ишларни қилиб юрган.

- 2005 йилда бирга келганмиз Швецияга. Кейин у Тошкентга қайтиб кетган эди. Шу йилни март ойида яна қайтиб келди,- дейди Азиз Муҳиддинов.

Айни пайтда Муроднинг Ўзбекистондаги қариндошлари молиявий имконлари бўлмагани боис марҳумни Швецияда дафн этишга розилик билдирганлар.

- Отаси билан охирги марта кеча гаплашдим. У розилик берди бу ерга кўмгани. Барибир Оллоҳнинг ери ҳамма жойда бир хил, уйда ҳам дуо қилса етиб борадию. Энди бугун ота-онаси аниқ жавобни беришади,- дейди Азиз Муҳиддинов.

Ҳозир марҳумнинг жасади Стокҳолм шаҳридаги Rattmedicin ўликхонасида сақланмоқда.

Унинг дўстлари жаноза учун пул йиғишаяпти.

- Ўликни олиш учун 20 минг швед крони (тахминан 2800 АҚШ доллари) керак экан. Ҳозир энди шу пул йиғиляпти. Масжидда қути қўйганмиз, келаётганлар ташлаб кетяпти. Ҳали саналмаган. Ҳозир Стокҳолмдан ташқаридаги ўзбеклар ҳам банк ҳисобига пул жўнатишяпти,- дейди Азиз Муҳиддинов.

Швецияда яшовчи Олим Қорабоевнинг айтишича, Швецияда ўзбекистонлик мухожирлар сони сўнгги йилларда кўпайиб қолган.

- Ҳа анча кўп. Бу ерда мусулмон қабристони бор. Бундан олдин ҳам ўзбеклар кўмилган. Марҳум укамизни ҳам ўзимизни мусулмонча урф одатлар билан кўмамиз, – дейди Қорабоев.

Швеция кўплаб ўзбек қочқинларини ўз бағрига олган давлат саналади. Ўнлаб ўзбек журналист ва ҳуқуқ ҳимоячилари шу давлатдан бошпана топган.

Кимнинг ёрдам бериш нияти ва имкони бўлса Forex 9420 1473716 ҳисобига жўнатсин.
Дафн маросимидан ортган пул марҳумнинг ота онасига жўнатилади.
Швециядаги ўзбек жамоаси
Алоқа учун телефон: 0735462867, 0762541460