Қирғизистон маҳбусхонасида яна бир ўзбек ўлдирилди

Қирғизистонда ўзбекларга қарши амалга оширилган қирғинга икки йил тўлган шу кунларда Бишкекдаги жазони ўташ муассасаларидан бирида ўз жазо муддатини ўтаётган Жалолобод вилоятининг Сўзоқ қишлоғидан бўлган Ғафуржон Абдурахмонов қирғизлар томонидан қийнаб ўлдирилган. Кеча пайшанба куни Ғафуржонни сўнгги манзилга кузатиш маросими бўлиб ўтди.

Биз Женевадаги Бирлашган Миллатлар Ташкилоти биноси олдида Қирғизистон ҳукуматига қарши кескин чоралар кўрилишини талаб қилиб пикет ўтказаётган Европадаги бир гуруҳ ўзбеклар Ғафуржон Абдураҳмоновнинг ота онаси ва яқинларига ўзимизнинг чуқур таъзиямизни изҳор қиламиз.

2010 йилда ўзбекларга қарши жиноятчи гуруҳлар, ички ишлар ходимлари, ҳуқуқ тартибот гуруҳлари ва ҳукуматдаги миллатчи сиёсатчилар ўзаро бирлашган эди. Ҳозир ҳам бу гуруҳлар жафокаш ўзбекларга қарши ўз жинояткорона ҳаракатларини тўхтатмаяптилар.

Қирғизистон ҳукуматидан биз яна бир марта ўзбекларга қарши зўравонликларга чек қўйишни талаб қиламиз!