Бошқа
МДҲ давлатларидан фарқли ўлароқ, Белорус, Қозоғистон, Қирғизистон
фуқаролари Россия фуқаролигини соддалаштирилган тартиб бўйича олиш
ҳуқуқига эга
Қирғизистон меҳнат ва миграция
вазири Алмасбек Абитовга кўра, Россияда расман рўйхатдан ўтган 590 минг
қирғизистонлик муҳожирнинг 270 минг нафари Россия фуқаролигини олган. Бу
ҳақда меҳнат вазири Қирғизистон парламенти мажлисидаги чиқишида айтган.
Алмасбек Абитовнинг айтишича, Россия
фуқаролигини олган қирғизистонликларнинг аксарияти ҳануз Қирғизистондаги
рўйхатдан чиқишмаган.
"Аслида бу жуда жиддий муаммо. Чунки,
муҳожирларга оид аниқ ҳисоботнинг йўқлиги боис, биз Россияда қнча
сондаги қирғизистонлик ўз фуқаролигини алмаштирган ва неча нафари
алмаштирмаганини аниқ айта олмаймиз"- деб айтган Қирғизистон меҳнат ва
миграция вазири Алмасбек Абитов.
Айни вақтда Россия фуқаролигини олган ва
олаётганларнинг аксари Қирғизистоннинг Ўш ва Жалолобод вилоятидан келган
ўзбеклар эканлиги айтилади.
Жорий йилнинг март ойида Ўш вилоят миграция
хизмати келтирган рақамларга биноан 2010 йилда 60 мингдан ортиқ киши Ўш
вилоятини тарк этган. Уларнинг аксарияти Россияга чиқиб кетишган. Ўш
вилоят миграция хизмати ҳисоб - китоблари бўйича ташқарига чиқиб
кетганлардан 6, 5 минг нафари Россия фуқаролигини олган.
Москва
вилоятида ишлаётган ўшлик Сирожиддин яқинда Россия фуқаролигини
олганлардан бири. Сирожиддинга кўра, Россия фуқаролигини олаётганларнинг
аксари қирғизистонлик ўзбеклардир.
"Чунки, ўзбеклар учун Қирғизистонда яшаш
ниҳоятда қийинлашмоқда. У ерда биз учун, хусусан, фарзандларимиз учун
келажак йўқ. Турли баҳоналар билан ўзбекларни қамашаяпти. Кўплар иложи
йўқлигдан, Россия фуқаролиги олиб, шу ерда макон қуришмоқчи", дейди
Сирожиддин.
Бошқа МДҲ давлатларидан фарқли ўлароқ, Белорус,
Қозоғистон, Қирғизистон фуқаролари Россия фуқаролигини соддалаштирилган
тартиб бўйича олиш ҳуқуқига эга.
Қозоғистон ва Қирғизистонликлар Россия
фуқаролигини олиш учун паспорт, миграция картаси ва регистрация
ҳужжатлари талаб этилади. Миграция идорасига керакли ҳужжатлар
топширилгандан сўнг, Россия фуқаролигини бериш ё бермаслик қарори 90
кундан кейин маълум этилади.
Қирғизистон ҳукумати ҳисоб - китоби бўйича 2010
йилда меҳнат муҳожирлари Қирғизистонга 1 миллиард доллардан ортиқ пул
жўнатишган. Қирғизистон Марказий банки маълумотига кўра, жўнатма
пулларнинг 98 фоизи Россия Федерациясидагилар ҳисобига тўғри келади.
